“Эрдэнэт үйлдвэр”-ийн захирал асан Ц.Даваацэрэнгийн хэргийг шалгаж дуусч, нийслэлийн прокурорын байгууллагаас анхан шатны тойргийн шүүхэд шилжүүлжээ.
Тодруулбал, Ц.Даваацэрэнг “Эрдэнэт үйлдвэр” ХХК-ийн удирдах албан тушаалтнаар ажиллаж байхдаа албан тушаалын байдлаа урвуулан ашиглаж, нэр бүхий компанитай байгуулсан гэрээгээр 34.9 тэрбум төгрөгийн орлого олох боломжийг алдагдуулсан, “Эрдэнэт Медикал” төв эмнэлгээс үйлдвэрийн ажилтнуудад хөнгөлөлттэй нөхцөлөөр эрүүл мэнд, эмнэлгийн тусламж, үйлчилгээ үзүүлэх гэрээ байгуулсан, эрх бүхий байгууллагын шийдвэр гараагүй байхад “Хөрөнгө баланснаас хасах” тухай тушаал гаргаж, бусдад шилжүүлэн улсад их хэмжээний хохирол учруулсан хэрэгт буруутгагдан шалгасан байна.
Эрүүгийн хуулийн 18.6 дугаар зүйлийн 2.3 /Мөнгө угаах/, Эрүүгийн хуулийн 22.1 дүгээр зүйлийн 2 /Эрх мэдэл, албан тушаалын байдлаа урвуулан ашиглах/, Эрүүгийн хуулийн 22.10 дугаар зүйлийн 1 /Үндэслэлгүйгээр хөрөнгөжих/-д зааснаар яллах дүгнэлт үйлдэж Баянгол, Хан-Уул, Сонгинохайрхан дүүргийн эрүүгийн хэргийн анхан шатны тойргийн шүүхэд тус тус шилжүүлжээ. Түүнийг 2019 оноос Авлигатай тэмцэх газраас шалгаж эхэлсэн байдаг.
Шадар сайд С.Амарсайхан гурван жилийн өмнө буюу 2022 онд “Уг эмнэлгийг хувийн хэвшилд шилжүүлэхдээ 18 жилийн гэрээ хийсэн ч нэг ч төгрөгийн төлбөр төлөөгүй. Ганцхан эмнэлэг биш 50 айлын орон сууц, авто зогсоол, тоног төхөөрөмж, эд хогшлууд шилжүүлж авсан ч өнөөг хүртэл улсад ямар ч төлбөр төлөөгүй.
Ингээд зогсохгүй “Эрдэнэт үйлдвэр”-ээс 2016-2022 оны хооронд 12,7 тэрбум төгрөг шилжүүлэн авчээ.
Энэ мэтээр төрийн өмч үнэгүйддэг, төрийн мөнгөөр өөрийнх нь хөрөнгийг худалдаж авдаг асуудал цөөнгүй байгаа учраас эдгээрийг цэгцлэх ажилд Засгийн газар онцгой анхаарч байна” гэдгийг онцолж байсан юм.
Шүүхэд шилжүүлсэн зарим хэргээс дурдвал:
-
Гадаад улс дахь Хөдөлмөр, нийгмийн хамгааллын төвд нийтийн албан тушаалтнаар ажиллаж байсан Д.Б нь албан тушаалын бүрэн эрхээ урвуулан ашиглаж, тусгай шаардлага хангаагүй иргэнийг хууль бус тушаал гарган ажиллуулсан, дээрх төвийн үйл ажиллагаа явуулж байсан оффисын зориулалттай үл хөдлөх хөрөнгийн барьцааны төлбөрөөс 49.6 сая төгрөгийг завшиж өөртөө болон бусдад давуу байдал бий болгосон хэрэгт Эрүүгийн хуулийн 22.1 дүгээр зүйлийн 1 /Эрх мэдэл, албан тушаалын байдлаа урвуулан ашиглах/-д зааснаар яллах дүгнэлт үйлдэж Дүүргийн эрүү, иргэний хялбар ажиллагааны тойргийн шүүхэд,
-
Эд хөрөнгийн эрхийн улсын бүртгэлийн газарт нийтийн албан тушаалтнаар ажиллаж байсан П.М нь Б.Х-тай урьдчилан тохиролцож, бусдын иргэний үнэмлэхийн лавлагаануудыг ашиглан эзэмшил газрыг нь худалдах, худалдан авах гэрээг хуурамчаар хийж, худалдан борлуулсны хариуд өөртөө эдийн давуу байдал бий болгож, улсад 32.4 сая төгрөгийн хохирол учруулсан, мөн гүйцэтгэх ёсгүй үйлдлийг хийсний хариуд бусдаас хахууль авсан хэрэгт Эрүүгийн хуулийн 22.4 дүгээр зүйлийн 4 /Нийтийн албан тушаалтан хахууль авах/-д зааснаар яллах дүгнэлт үйлдэж Баянзүрх,Чингэлтэй,Сүхбаатар дүүргийн эрүүгийн хэргийн анхан шатны тойргийн шүүхэд,
-
Нийслэлийн Хяналт шалгалтын газарт мэргэжилтнээр ажиллаж байсан Б.Т нь нэр бүхий компанийн хэрэгжүүлж буй дэд өртөө, цахилгаан дамжуулах кабель шугамын ажлыг улсын комиссоор баталгаажуулан, байнгын ашиглалтад хүлээн авах албаны чиг үүргээ хэрэгжүүлэхийн тулд бусдаас хахууль авсан хэрэгт Эрүүгийн хуулийн 22.4 дүгээр зүйлийн 1 /Нийтийн албан тушаалтан хахууль авах/-д зааснаар яллах дүгнэлт үйлдэж Баянгол, Хан-Уул, Сонгинохайрхан дүүргийн эрүүгийн хэргийн анхан шатны тойргийн шүүхэд,
-
Иргэн Ц.Д нь “Эрдэнэт үйлдвэр” ХХК-ийн удирдах албан тушаалтнаар ажиллаж байхдаа албан тушаалын байдлаа урвуулан ашиглаж, нэр бүхий компанитай байгуулсан гэрээгээр 34.9 тэрбум төгрөгийн орлого олох боломжийг алдагдуулсан, “Эрдэнэт Медикал” төв эмнэлгээс үйлдвэрийн ажилтнуудад хөнгөлөлттэй нөхцөлөөр эрүүл мэнд, эмнэлгийн тусламж, үйлчилгээ үзүүлэх гэрээ байгуулсан, эрх бүхий байгууллагын шийдвэр гараагүй байхад “Хөрөнгө баланснаас хасах” тухай тушаал гаргаж, бусдад шилжүүлэн улсад их хэмжээний хохирол учруулсан хэрэгт Эрүүгийн хуулийн 18.6 дугаар зүйлийн 2.3 /Мөнгө угаах/, Эрүүгийн хуулийн 22.1 дүгээр зүйлийн 2 /Эрх мэдэл, албан тушаалын байдлаа урвуулан ашиглах/, Эрүүгийн хуулийн 22.10 дугаар зүйлийн 1 /Үндэслэлгүйгээр хөрөнгөжих/-д зааснаар яллах дүгнэлт үйлдэж Баянгол, Хан-Уул, Сонгинохайрхан дүүргийн эрүүгийн хэргийн анхан шатны тойргийн шүүхэд тус тус шилжүүллээ.
