Өнгөрсөн онд Японд төрсөн хүүхдийн тооноос нас барсан хүний тоо бараг саяар илүү бүртгэгдсэн нь 1968 оноос хойшхи засгийн газрын судалгаагаар тэмдэглэгдсэн хүн амын хамгийн огцом бууралт болж байна.
2024 онд Японы иргэдийн тоо 908,574-аар буурчээ
Ерөнхий сайд Шигэру Ишиба Японы хөгшрөлтийн хүн амын хямралыг “чимээгүй онц байдал” хэмээн нэрлэж, үнэ төлбөргүй хүүхдийн асаргаа, уян хатан ажлын цаг зэрэг гэр бүлд ээлтэй бодлого хэрэгжүүлэхээ амлажээ.
Гэвч энэ нь япон эмэгтэйчүүдийн төрөлтийн туйлын доогуур түвшинд бараг нөлөө үзүүлээгүй байна.
Дотоод хэрэг, харилцаа холбооны яамнаас гаргасан шинэ мэдээллээр 2024 онд Японы иргэдийн тоо 908,574-аар буурчээ. Мөн 686,061 төрөлт бүртгэсэн нь 1899 оноос хойшхи хамгийн бага үзүүлэлт бөгөөд бараг 1.6 сая хүн нас барсан байна. Өөрөөр хэлбэл, нэг хүүхэд төрөхөд хоёр хүн нас барж байна гэсэн үг.
Ингэснээр хүн ам 16 жил дараалан буурч, улсын тэтгэврийн болон эрүүл мэндийн системд дарамт учруулж байна.
15–64 насны хөдөлмөрийн үеийн хүн ам 60 орчим хувь болж буурсан байна.
Гадаад иргэдийн тоо 2025 оны 1 сарын 1-ний байдлаар 3.6 саяд хүрч, хүн амын бараг 3 хувийг эзлэх болжээ. Засгийн газар дижитал нүүдэлчдийн виз, ур чадварын хөтөлбөр зэрэг арга хэмжээ авч, гадаад ажиллах хүчийг тодорхой хэмжээнд хүлээн зөвшөөрч байгаа ч, цагаачлал нь консерватив хандлагатай оронд улс төрийн хувьд эмзэг сэдэв хэвээр байна.
Улсын нийт хүн ам 2023 оноос 0.44 хувиар буурч, оны эхэнд ойролцоогоор 124.3 саяд хүрчээ. 65 ба түүнээс дээш насныхан хүн амын бараг 30 хувийг эзэлж байгаа нь Дэлхийн банкны мэдээллээр Монакогийн дараа дэлхийд хоёрт орж байна. Харин 15–64 насны хөдөлмөрийн насны хүн ам 60 орчим хувь болж буурсан байна.
Өнгөрсөн 20 жилийн хугацаанд орон даяар бараг дөрвөн сая гаруй айлын орон сууц эзгүйрсэн бөгөөд олон хот, тосгод хүнгүй болж байна.
Төрөлтийн түвшин сайжирсан ч үр дүн нь хэдэн арван жилийн дараа л гарна.
Засгийн газар төрөлтийг нэмэгдүүлэх зорилгоор орон сууцны татаас, цалинтай эцэг эхийн чөлөө зэрэг урамшуулал олгож ирсэн ч, нэвт шингэсэн соёл, эдийн засгийн бэрхшээл хэвээр байна.
Амьжиргааны өндөр зардал, цалин нэмэгдэхгүй байх, ажлын хатуу соёл зэрэг нь олон залуусыг гэр бүл зохиохоос татгалзахад хүргэдэг. Ялангуяа эмэгтэйчүүд нийгмийн хэвшмэл ойлголт болсон үүрэг бүхий хүүхэд асрах гол ачааг үүрэх, хангалттай дэмжлэггүй байх нөхцөлтэй тулгардаг.
Японы нэг эмэгтэйд ногдох хүүхдийн дундаж тоо буюу төрөлтийн түвшин 1970-аад оноос хойш тогтмол бага байгаа тул мэргэжилтнүүд одооноос эрс сайжирсан ч үр дүн нь хэдэн арван жилийн дараа л гарахыг анхааруулжээ.
Эх сурвалж: BBC
