НҮБ-ын Цөлжилттэй тэмцэх конвенцын талуудын 17 дугаар бага хурал буюу COP17 Монгол Улсад 2026 оны наймдугаар сарын 17-28-нд Үндэсний цэцэрлэгт хүрээлэнд зохион байгуулахаар болсон.
Дэлхийн 197 орны төрийн өндөр дээд албан тушаалтнуудаас гадна дунджаар 8,000 орчим төлөөлөгч хуралд оролцох бөгөөд 5,000 хүн нэг дор хуралдах конвейшн төвийг НҮБ-ын стандартад нийцүүлэн барихаар төлөвлөжээ.
Нийслэлийн зүгээс уг хурлын авто зам, барилга байгууламж, тохижилт, шугам сүлжээ зэргийг хариуцах юм байна. Бэлтгэл ажлын талаар өнөөдөр албаны хүмүүс танилцууллаа.
Нийслэлийн Засаг дарга бөгөөд Улаанбаатар хотын Захирагч Х.Нямбаатар: Нэг жилийн дараа Улаанбаатар хотод олон улсын хэмжээний томоохон үйл ажиллагаа зохион байгуулагдах гэж байна. COP17 бага хурал нь 2015 онд зохион байгуулагдсан АСЕМ-ын дээд хэмжээний уулзалтаас агуулга, цар хүрээний хувьд хэд дахин том арга хэмжээ. Тус хурлын бэлтгэл ажлын хүрээнд авто зам барих, автомашины зогсоолууд байгуулах, цэвэр, бохир усны шугам татах, шилэн кабель, холбоо дохиоллыг барьж байгуулах зэрэг ажил хийнэ. Өмнөх хурлуудыг дандаа эдийн засгийн өндөр чадавхтай улсууд зохион байгуулж байсан. Бидний хувьд их том сорилт. НҮБ-ын стандартад нийцүүлж тус хурлыг зохион байгуулахаар ажиллаж байна.
УСУГ-ын дарга Ц.Төрхүү: Бид 3.2 км цэвэр, бохир усны шугам тавих ёстой. Өнөөдрийн байдлаар ажлын гүйцэтгэл 70-80 хувьтай байна. Зураг төсөл наймдугаар сарын 15-нд бэлэн болж, бид ажилдаа орсон.
Бохирын шугам 80 хувьтай, цэврийн шугам 60 гаруй хувьтай байна. 14 хоногийн дотор багтаан ажлаа дуусгах төлөвлөгөөтэй байгаа.
Бороо орж байгаагаас шалтгаалж ажил зогсох тохиолдол гарч байна. Дэд бүтцийн ажлыг арваннэгдүгээр сарын 1-н гэхэд дуусгаж хүлээлгэж өгөх ёстой. Ажил хугацаанаасаа өмнө дуусах төлөвтэй байна. Барьж байгаа шугам мөн өргөх насос станцтай. Өргөх насос станцын сууриудыг тавьсан, суурилуулахад бэлэн болсон байна. Мөн дараа жилийн хавар усалгааны системийг суурилуулна.
Авто замын бүтээн байгуулалтын талаар НЗХГ-ын дарга Б.Одбаяр: 450 автомашины зогсоол, дөрвөн километр авто замын ажлыг гүйцэтгэнэ. Мөн гольфийн замын ажил бий. Үүний хүрээнд 363 метр куб газар шорооны ажил хийж гүйцэтгэнэ.
Өчигдрийн байдлаар 224 метр куб газар шорооны ажил хийсэн буюу 70 хувийн гүйцэтгэлтэй байна. Ирэх жилээс цементээр бэхжүүлсэн буталсан чулуун суурь дэвсэнэ. 2026 оны дөрөвдүгээр сард хучилтын ажлуудыг эхлүүлэхээр төлөвлөж байна.
“Үндэсний цэцэрлэгт хүрээлэн” ОНӨТҮГ-ын дарга Ё.Нямжав: Шинэ зуун айл худалдааны төвийн чанх урд, Үндэсний цэцэрлэгт хүрээлэнгийн ерөнхий төлөвлөгөөнд тусгагдсан хоёрдугаар ээлжийн төлөвлөлтийн 22-28 га талбайд нийт тохижилт хийгдэнэ.
Үндсэн байгууламжийн гадна ногоон байгууламж байгуулах юм. Энэ арга хэмжээний дараа цэцэрлэгт хүрээлэнг суурь дэд бүтэц төлөвлөлттэйгөөр хөгжүүлэх боломжтой болно. Мөн энэ талбайд улс, хотын хэмжээний арга хэмжээнүүдийг хийх дэд бүтэц давхар шийдэгдэх давуу талтай.
Байгууламжийн зохион байгуулалтын талаар COP17 Хөрөнгө оруулалт, бүтээн байгуулалтын газар ОНӨААТҮГ-ын дарга Б.Баттулга: НҮБ-ын хүлээн авагч орны хэлэлцээрийн дагуу, олон улсын жишигт нийцсэн угсардаг түр байгууламж барина. Тус байгууламж нь дараах бүтэцтэй байна. Арваннэгдүгээр сард ерөнхий гүйцэтгэгчдийг сонгон шалгаруулна. ТЭЗҮ батлагдах шатандаа явж байна.
Тус байгууламж нь гурван сарын дотор угсарч бэлэн болох учир бид НҮБ-д 2026 оны долоодугаар сарын 15-нд хүлээлгэж өгч, түүнээс хойш НҮБ хамгаалалтад авч хурлыг зохион байгуулна. Ногоон бүсэд өмнө нь хоолны фестивальд ашигласан асрыг хэрэглэх зэргээр зардлаа хэмнэнэ.
