Улсын Их Хурлын гишүүн Ж.Алдаржавхлан санаачлан өргөн мэдүүлсэн “Түгээмэл тархацтай ашигт малтмалын тухай хуульд нэмэлт, өөрчлөлт оруулах тухай хуулийн төсөл”-ийн талаар хэлэлцэж байна.
УИХ-ын Ж.Батжаргал:
Энэ асуудлыг бид зөв зохицуулахгүй бол болохгүй. Орон нутагт түгээмэл тархацтай ашигт малтмал ашиглах гэхээр зөвшөөрлийн тухай асуудал хүндрээд, бүтээн байгуулалтын ажлаа шуурхайлъя гэхээр орон нутгийн удирдлагууд улс төржөөд, энд тэнд матаж асуудал үүсгэх хандлага байдаг.
Улсын чанартай авто замын бүтээн байгуулалт олон шат дамжлагаар асуудал нь шийдэгдэж байгаа болохоос биш орон нутгийн бүтээн байгуулалтад түгээмэл тархацтай ашигт малтмал ашиглах бараг боломжгүй байгаа. Тиймээс уг хуулийн шинэчилсэн найруулгад орон нутагт үүнийг ашиглах тал дээр холбогдох салбарууд анхаарлаа тавьж ажилламаар байна. Эс бөгөөс бүтээн байгуулалтын ажлыг удаашруулж, хүндрүүлэх гээд байна. Голын элс хайрга стандартын хувьд нийцдэг юм уу. Зарим нь нийцдэггүй л гээд байгаа. Үнэхээр стандартад нийцэхгүй бол дайрга ашиглах аргачлал руу шилжмээр л байгаа юм. Үүн дээр хуулийн төсөл санаачлагч хийсэн судалгаа, дүгнэлт бий юу.
УИХ-ын дарга Н.Учрал нэмээд “”Түгээмэл тархацтай ашигт малтмал олборлоход өмнө нь тусгай зөвшөөрөл авдаг байсан бол уг хуулиар одоо энгийн зөвшөөрөлд хамруулахаар байгаа” гэв.
УИХ-ын гишүүн Ж.Алдаржавхлан:
Энэ хууль бол зөвхөн УБ-т ч биш Монгол Улсын хэмжээнд мөрдөгдөх юм. Уг хуулийг санаачлах болсон нь Туул гол руу баруун тийш харах юм бол дайн болсон мэт дүр зурагтай байна. 46 ААН олборлолт хийгээд хаяад явчихсан, бүр иргэдийн хашаатай тулгаж хайрга олборлосон. Тиймээс энэ асуудлыг шийдэхгүй бол иргэдийн аюулгүй амьдрах эрхийг зөрчиж байна. Энэ хуулийн хамгийн гол үзэл санаа нь ард иргэдийн эрхийг хамгаалахад оршиж байгаа юм. Мөн уг хуульд хэрэв иргэн хэрэв гомдол гаргах юм бол түүнийг үндэслэн тусгай зөвшөөрлийг цуцална. Тусгай зөвшөөрөл хатуу байхаар ялангуяа орон нутагт хулгайгаар олборлох нь маш их болсон тул хөнгөвчлөх асуудалд санал нэг байна.
УИХ-ын гишүүн Н.Наранбаатар:
Энэ хуулийг заавал оруулж ирэх хэрэг байсан уу. Хуучин хуулиараа явбал асуудалгүй л санагдах юм. Учир нь орон нутгийн бүтээн байгуулалтад халгаатай л юм. НИТХ-ийн журмаар ч юмуу Улаанбаатарын Туул голын ай савд олборлолт явуулах талаар зохицуулалт хийж болохгүй юу.
