АНУ-ын ерөнхийлөгч Дональд Трамп Гринланд арлыг өөртөө нэгтгэх гэсэн оролдлогыг нь эсэргүүцсэн Европын найман улсын бараанд татвар ногдуулна гэж сүрдүүлсэн. Түүний энэ сүрдүүлгийг Европын удирдагчид хүчтэй шүүмжилж, үүнийх нь эсрэг хариу арга хэмжээ авахаар төлөвлөж байгаагаа мэдээлжээ.
Тодруулбал уг сүрдүүлэгд багтсан Дани, Норвеги, Швед, Франц, Герман, Их Британи, Нидерланд, Финланд улсын удирдагчид хамтарсан мэдэгдэл гаргасан. Үүнд “Татварын заналхийлэл нь Атлантын далай дамнасан харилцааг доройтуулах эрсдэлтэй. Бид бүрэн эрх, тусгаар тогтнолоо хамгаалах байр суурьтай байна” хэмээн дурджээ.
Өнгөрсөн зун Европын удирдагчид Трамптай байгуулсан худалдааны хэлэлцээрийн хүрээнд АНУ-ын 93 тэрбум еврогийн бараанд татвар ногдуулахаа түр зогсоогоод байсан. Харин ням гарагт хийсэн уулзалтаараа татвар ногдуулах төлөвлөгөөг дахин сэргээх асуудлаар хэлэлцсэн байна.
Францын ерөнхийлөгч Эммануэль Макрон Трампын татварын заналхийллээ хэрэгжүүлбэл Европын Холбооноос хүчтэй шахалт үзүүлэх хэрэгтэйг бусад удирдагчдад уриалжээ.
Өнгөрсөн долоо хоногт Трамп “Гринланд арлыг зайлшгүй АНУ-д нэгтгэх шаардлагатай” гэж мэдэгдсэний дараа Европын зарим улс Гринландад цэргээ нэвтрүүлсэн тухай мэдээлэл гарсан.
Эх сурвалж: The Guardian
