Оршуулгын тухай нийтийн өргөдөл санаачлагч иргэн Д.Гансаруул заналхийлэлд өртөж байгаа асуудлаар Цагдаагийн Ерөнхий Газар (ЦЕГ)-т гомдол гаргасан талаараа мэдээллээ.
Тодруулбал оршуулгын асуудлыг хөндсөний дараа түүнийг “шатаана”, “Баян-Өлгийд аваачаад чандарлана” хэмээн заналхийлсэн бүлэг этгээдүүдийг шалгуулахаар цагдаагийн байгууллагад хандсанаа хэлж байлаа.
Одоогоор “Оршуулгын газрын эмх цэгц, эрх зүйн шинэчлэлийг хийцгээе” нийтийн өргөдлийг 100,000 хүн дэмжиж, гарын үсэг цугласан байна.
Иргэн Д.Гансаруул хэлэхдээ “D-Parliament дээр оршуулгын тухай хуультай болох өргөдлийг санаачилсан. Энэхүү өргөдлийг УИХ, парламентын түвшинд хэлэлцэж байгаа. Одоо ажлын хэсэг байгуулах шат руугаа орсон.
Өнгөрсөн Баасан гарагт Өргөдлийн байнгын хорооны санал дүгнэлтийг УИХ-ын чуулганаар хэлэлцэж, дүгнэлтийг УИХ-ын гишүүдэд уншиж танилцуулан асуултад хариулсан. Тэр үеэс эхлээд цахим орчинд намайг заналхийлж, харааж доромжилсон маш олон сэтгэгдэл бичиж байна.
Баасан гарагийн чуулганы хуралдаан дээр хэлсэн бичлэгийн сэтгэгдэл хэсэгт “бид чамайг шатааж үнс болгоно” гэж сүрдүүлж заналхийлсэн.
Миний хувийн хаяг болон цахим орчинд нийтлэгдсэн видеоны сэтгэгдэл хэсэгт цочирдохоор хэмжээний үг өгүүлбэр бичиж байна.
Өчигдөр хуульчаас зөвлөгөө авахад цагдаагийн байгууллагад яаралтай хандах шаардлагатайг хэлж, өнөөдөр Цагдаагийн Ерөнхий Газарт гомдлоо өгөөд гарч ирлээ” гэв.
Үргэлжлүүлэн “Би 100,000 хүний саналыг цуглуулсан. Тэр саналыг цуглуулаад УИХ-д өргөн барьж байгаа иргэн хүн. Миний амь насанд ингэж заналхийлж байгаад айж байна.
Цаашид хууль батлагдах хүртэл хамтдаа энэ бүхний төлөө тэмцэхгүй бол хууль санаачилсан хувь хүн рүү хандсан дарамт сүрдүүлэг, заналхийлэл үргэлжлэх шинжтэй байгаа.
Ээж, хүүхдүүд рүү маань танихгүй дугаараас залгаж байна. Манай гэр бүлийнхэн нэлээд айдастай, болгоомжилж байгаа.
Монголд Оршуулгын тухай хууль огт байдаггүй учраас нийтийн өргөдлийг санаачилсан. Миний өргөдөлд хэсэг бүлэг хүн рүү хандсан ганц ч үг үсэг байхгүй. Оршуулгын газруудыг эмх цэгцтэй болгож, эрх зүйн орчныг шинэчилье гэдэг гарчигтай.
Монгол Улс оршуулгын хуультай болох цаг нь болсон.
Намайг заналхийлж байгаа нь цаашид хуулийн төсөл боловсруулах ажилд битгий оролцоосой, няцаасай гэж айлгаж сүрдүүлж байна уу даа гэж хараад байгаа юм.
Нара гишүүн манай ажлын хэсэгт орохоор байгаа. Харин А.Ариунзаяа гишүүний хуулийн төсөл манайхаас тусдаа илүү зан үйл тал руугаа юм билээ.
Таны хуулийн төсөлд Баян-Өлгий аймгийн асуудлыг огт тусгаагүй байна гэдгийг А.Ариунзаяа гишүүнд хэлсэн. Хуулийг энэ чигээр нь баталбал гол, нуурын эрэг дээр байгаа оршуулгыг тэр чигээр нь үлдээх үү гэсэн чинь, тэгнэ гэсэн.
100,000 иргэд маань гол, нуурын эрэг дээр байгаа оршуулга булш бунхныг цэвэрлэж өгөхийг шаардаж гарын үсэг зурсан. Тиймээс ажлын хэсгийнхэн, УИХ энэ талд анхаарч өгөөч ээ.
Би 2013 оноос хойш Баян-Өлгийд үүссэн асуудлыг хөндөж, газар усныхаа нэрийг монгол болгуулах талаар нийтлэл бичиж байсан. Тэр үед хүмүүс ойлгож хүлээж авдаггүй байсан. Одоо намайг ойлгодог болсон байна” гэдгийг иргэн Д.Гансаруул нэмж хэллээ.
