Эрүүгийн цагдаагийн албаны Кибер гэмт хэрэгтэй тэмцэх хэлтсийнхэн бусдын фэйсбүүк хаягт нэвтрэх нууц үгийг олж авч 40 гаруй сая төгрөг залилсан хоёр этгээдийг баривчилжээ. Дээрх этгээдүүд нь Дархан-Уул аймгийн харьяат 18 настай Т, Ш нар бөгөөд тэднийг өнгөрсөн оны 10-р сараас 2018 оны гуравдугаар сар хүртэлх хугацаанд 60 орчим фэйсбүүк хэрэглэгчийн хаягт хууль бусаар нэвтэрсэн байж болзошгүй хэрэгт холбогдуулан шалгаж байна. Эх сурвалжийн мэдээлж байгаагаар энэхүү гэмт хэргийг үйлдсэн этгээдүүд нь ихэвчлэн 8811, 9911 утасны дугаартай фэйсбүүк хаяг руу “brute force attack” гэх программыг ашиглан нэвтэрч, 60 орчим иргэний фэйсбүүк чатыг ашиглан найз нөхөд, хамаатан садан, ажлын газрынх нь хүмүүсээс мөнгө гуйж авсан нь тогтоогджээ.
Ийм гэмт хэргүүд сүүлийн үед ихээхэн гарах болсон учир Эрүүгийн цагдаагийн албаны Кибер гэмт хэрэгтэй тэмцэх хэлтсээс иргэд олон нийтэд фэйсбүүк болон цахим шуудангийнхаа нууц үгийг олон тэмдэгтэй болгож, тааварлах боломжгүй байдлаар өөрчилж хэвших, мөн худал хуурмаг мэдээллийн линк рүү дарж орохгүй байх зэргээр гэмт хэргийн хохирогч болохоос сэргийлэх шаардлагатай байгааг анхааруулж байна. Нөгөө талаар фэйсбүүк сүлжээгээр хэн нэгэн тань руу хандаж мөнгө гуйсан тохиолдолд заавал утсаар эсвэл биечлэн уулзаж үнэн эсэхийг нь лавлаж байхыг зөвлөж байна.
