Ирэх Ням гарагт Буриадын нийслэл Улаан-үд хотноо буриад бөхийн олон улсын тэмцээн явагдах гэж байна. 11 дэх удаагаа явагдаж байгаа тус тэмцээнийг Цагаан Дарь эхэд зориулан зохион байгуулдаг уламжлалтай билээ. Буриадын Спорт, залуучуудын асуудал эрхэлсэн яамнаас энэ жил тус тэмцээнийг ОХУ-ын Ерөнхийлөгч В.Путинд зориулан зохион байгуулхаар болсноо мэдэгджээ. Тус яамны сайд Вячеслав Дамдинцурунов “Буриад бөхийн хамгийн том тэмцээний нэг нь энэ тэмцээн. Энэ тэмцээнд Буриад, Байгалийн хязгаар, Эрхүү, Монголоос ирсэн нийт 1000 бөх зодоглоно. Мөн Якут, Тува, Алтайн хязгаар, Хакасаас ч баг ирж магадгүй” гэж мэдэгдсэн байна. Буриад бөхийн олон улсын тэмцээн нь 2007 оноос эхлэн Хамба лам Дамба Аюшеевийн ивээл дор явагдаж байгаа бөгөөд 11 дэх удаагийн тэмцээнд насанд хүрэгчдээс гадна 2002 оноос хойш төрсөн залуус 63, 75, + 75 кг-ийн жинд өрсөлдөнө.
