Люмино хамтлаг бол сайн, муу хэлэгдэн олон жилийн туршид уран бүтээлээ хийсээр, хийсэн бүтээл нь ч олонд хүрсээр яваа. Сайн, муу гэхийн учир нь зарим хэсэг хүмүүс 1990-ээд оны сүүлчээс үүсэн байгуулагдсан анхдагч хип хоп, рэп хамтлагуудыг ахмад үе гэж адалж, бараг тэтгэвэрт суух цаг нь болсон гэлцдэг. Харин тэд урлаг тэтгэвэрт гардаггүй гэдгийн жишээг өнөөдрийг хүртэл үзүүлж л явна. Түүний нэг бол Люмино хамтлаг. Тус хамтлагийн гишүүн болох МС буюу Д.Тэмүүжин “Гэрэлтэй цонх” нэвтрүүлгийн үеэр өөрийгөө хэрхэн цөллөгөнд өртөж байсан тухай дурсамжаасаа хуваалцсан юм.
Тэрээр есдүгээр ангидаа муу дүнтэй гарч байжээ. Учир нь яг тэр үед буюу 1998 онд хип хоп хэмээх шинэхэн ертөнцөд Люмино гэх хамтлаг мэндэлсэн аж. Сурлага нь муудсан Д.Тэмүүжиний ээж, аав нь түүний энэ сонирхлыг огт дэмждэггүй байж. Улмаар 10 дугаар ангиа төгссөн 1999 онд түүнийг урлагаас салгах зорилгоор цөллөгт явуулсан байна. Энэ талаар МС “Манай аав, ээж сэхээтэн. Намайг гадагшаа, дотогшоо дээд сургуульд явуулна гэсэн төлөвлөгөөтэй байсан юм. Тэгээд л хип хоп, рэп болгохгүй гээд Хөвсгөлийн Мөрөн лүү цөлчихсөн. Тэнд очоод би юун хип хопоо хаях. Дэвтэр дүүрэн шүлэгтэй ирж байсан юм. Тэгэхээр Улаанбаатарт дөнгөж хип хоп үүсч байхад Мөрөнд зэрэг үүсчихэж байгаа юм. Ингээд би чинь 52-р сургуулиас Мөрөнд очоод цөлөгдөж, арваа төгсөөд ирсэн шүү дээ.” хэмээн дурсан ярьлаа.
Мөн хип хоп урсгалын талаар “Анх бид хамтлаг байгуулж байх үед хип хоп урсгал бол насгүй гээд байсан. Харин цаг хугацаа явах тусам бидний тэгж бодож байсан зүйл биш юм байна гэдгийг ойлгосон. Яагаад гэвэл дэлхийн Billboard-ын 100 дууны 70 дуу нь хип хоп дуу байна. Энэ урсгал бол цаашдаа улам урт настай гэдэг нь батлагдаад байгаа юм. Улам цэцэглэн хөгжих урсгал юм байна гэж харагдаад байгаа.” гэж тайлбарласныг дашрамд сонирхуулъя.
