ТЕГ-ын дарга асан Б.Хурцын гомдлын дагуу УИХ-ын гишүүн Ж.Батзандан өнөөдөр АТГ-т гэрчийн мэдүүлэг өгчээ. Үүнтэй холбоотой асуудлаар УИХ-ын гишүүн Ж.Батзандан байр сууриа илэрхийллээ.
Тэрээр “Нэгд, 2018 оны арванхоёрдугаар сард УИХ-ын 40 гаруй гишүүн санаачилга гарган тухайн үеийн ТЕГ-ын дарга асан Б.Хурцтай холбоотой УИХ-д ирсэн 10 гаруй өргөдлийн талаар иргэдийг сонсох нээлттэй хэлэлцүүлгийг зохион байгуулсан. Уг өргөдөл нь С.Зоригийн хэргийг шалгасан байдалтай холбоотойгоор Т.Чимгээ, Б.Содномдаржаа нарын гэр бүлээс ирсэн өргөдөл байсан. Хоёрт, Эрдэнэт үйлдвэрийн 49 хувийг Худалдаа хөгжлийн банкинд авч өгөх үйл явцад ТЕГ-ын дарга асан Б.Хурц оролцсон гэдгээ хэвлэлээр хэлсэн байдаг. Та бүхэн үүнийг мэдэж байгаа.
Гуравт, Д.Энхбат гэдэг хүнийг Тагнуулын гурван ажилтан Франц, Германыг дамжуулж Европын холбооны зөвшөөрөлгүйгээр авч ирсэн тухай гэр бүлийнх нь гомдол УИХ-д ирсэн. Мөн Ханбогд кашмер компанийн гэр бүлийн 10 гаруй хүнийг Б.Хурц дарамталж байсан тухай, Татварын ерөнхий газрын Д.Энхбатыг дарамталсан тухай, Тагнуулын газрын ажилтан Цогтбаатарын гэр бүлд Б.Хурц гэдэг хүн дарамт шахалт үзүүлдэг тухай өргөдөл, гомдол ирсэн. 10 гаруй гомдлыг өнгөрсөн оны арванхоёрдугаар сард УИХ-ын таван гишүүн нээлттэй хэлэлцүүлэг хийж ярьсан.
Гэтэл өнөөдөр Авлигатай тэмцэх газрын мөрдөн байцаах албаны дарга Н.Дамдинсүрэн, Улсын ерөнхий прокурор М.Энх-Амгалангаас ирсэн бичгийн дагуу Б.Хурцтай болон Эрдэнэтийн 49 хувь, С.Зоригийн хэрэгтэй холбоотой асуудлыг ярьж байгаа гишүүдэд эрүүгийн хэрэг үүсгэхийг ярьж эхэлж байна.
Өнөөдөр надаас Б.Хурцын гомдлын дагуу гэрчийн мэдүүлэг авч байна. Ордонд нээлттэй хэлэлцүүлэг хийснийг буруутгаж байна. Нээлттэй хэлэлцүүлэг, нээлттэй сонсголыг УИХ-ын гишүүд өдөр бүр хийдэг. Гэвч нээлттэй сонсголыг хийхдээ хууль зөрчсөн хэмээн эрүүгийн хуулийн 22.1 зүйл ангиар зүйлчлэх гэж байгаа юм байна. Уг зүйл анги нь нийтийн албан тушаалтан албаны эрх мэдлээ хэтрүүлэх, урвуулан ашиглах тухай заасан байна. Өөрөөр хэлбэл, УИХ-ын нээлттэй сонсгол хийж байгаа УИХ-ын гишүүдэд өнөөдрөөс эхлэн эрүүгийн хэрэг үүсгэхээр Прокурор, АТГ ажиллах юм байна. Өөрөөр хэлбэл, Эрдэнэтийн 49, 51 хувийн асуудал, С.Зоригийн амь насыг хөнөөсөн хэрэгтэй холбоотой асуудлыг битгий яриач гэсэн шаардлагыг тавьж байгаа юм. Уг асуудлуудыг ярьж, нээлттэй сонсгол хийвэл эрүүгийн хэрэг үүсгэнэ гэдэг сануулгыг өнөөдөр өгч байгаа юм байна хэмээн ойлгож байна. Ард түмнээс сонгогдсон гишүүдийг дарамтлах, айлган сүрдүүлэх ажиллагаагаа хууль хяналтын байгууллага эхлүүлж байгаа юм байна. Хууль хяналтын байгууллагын төрд шургалсан мафийн бүлэглэлийн дарамт шахалтын өмнө бөхийхгүй. Төрд шургалсан мафийн бүлэглэлийн айлган сүрдүүлэх үйл ажиллагааны өмнө УИХ-ын гишүүд сөгдөж болохгүй. Эцсээ хүртэл тэмцэх болно” гэлээ.
