УИХ-ын гишүүн Ж.Батзандан жил бүр наймдугаар сарын эхээр сургууль, цэцэрлэгийн удирдлага, эцэг эхийн төлөөллийг хүлээн авч уулздаг уламжлалтай аж. Энэ удаагийн хэлэлцүүлэгт тэрээр өнөөдөр Баянзүрх дүүргийн 11, 12, 13, 16-р хорооны 6 сургууль, 7 цэцэрлэгийн удирдлага, багш, эцэг эхийн төлөөллүүд болон БСШУСЯ, НБГ-ын төлөөлөл 20 гаруй хүн оролцож, тулгамдаж буй асуудлаа хэрхэн шийдвэрлэх талаар хэлэлцлээ.
Уулзалтын үеэр тус дүүрэгт хэд хэдэн сургууль, цэцэрлэгийн барилгын ажилд асуудал үүсээд байгаа талаар иргэд онцоллоо. Тухайлбал, 126-р сургуулийн барилга угсралтын ажил долоон жил царцсан хэвээр байгаа, 88-р сургууль спорт заалгүй, 40-р яслийн дээвэр, шаланд нуралт үүссэн тул барилгыг нь буулгах дүгнэлтийг МХЕГ 2010 оноос хойш гурван удаа гаргасан ч үйл ажиллагаа явуулсаар байгаа зэрэг асуудлыг хөндөв.
Харин УИХ-ын гишүүн Ж.Батзандан энэ үеэр хэлсэн үгэндээ “Дутуу баригдсан цэцэрлэг, сургуулиудыг ирэх сараас өмнө гүйцээн барих шаардлагатай байна. Хичээлийн шинэ жил эхлэх гэж байхад зарим сургууль, цэцэрлэгийн барилгын ажил эхлээгүй, тендерийн сонгон шалгаруулалт хийгдэж дуусаагүй байгаа, маш хариуцлагагүй байдал түгээмэл ажиглагдаж байна. Цаашид барилгын ажилтай холбоотой тендерийг 3, 4-р сард зарлан, сонгон шалгаруулалтаа хийгээд, хичээл завсарламагц барилгын ажлыг эхлүүлж байх тал дээр яамд болон Худалдан авах газар анхааралдаа авах хэрэгтэй байна” гэдгийг онцолсон юм.
Мөн “Баянзүрх дүүрэгт улсын цэцэрлэг ховор. Монгол Улсын хэмжээнд цэцэрлэгийн хамрагдалт 70 хувь руу дөхөж байна. Үлдэж буй 30 хувийг хувийн хэвшилтэй хамтрах байдлаар буюу улсын төсвөөс хувьсах зардал болох 100 мянга гаруй төгрөгийг шилжүүлэх замаар шийднэ.” гэв.
Тус дүүргийн зарим цэцэрлэгт нэмж гэр цэцэрлэг барьж байгааг энэ үеэр дуулгасан юм. Энэ мэтчилэн асуудлыг шийдвэрлэхээр ажиллаж байгаа гэдгийг тайлбарлаж байлаа.
Уулзалтад оролцсон цэцэрлэгийн удирдлагууд болон эцэг эхийн төлөөлөл цэцэрлэгийг камержуулах шаардлагатай байгааг хэлж байв. Цэцэрлэгт нийтийн эзэмшлийн талбайд ганц хоёр камер тавьдаг ч анги танхимуудыг камержуулах төсвийг баталж өгдөггүй байна. Мөн сургуулийн багш нартай адил компьютер зэрэг дижитал хичээлийн хэрэгслээр хангагдах хүсэлтэй байгаагаа илэрхийллээ.
Хэлэлцүүлгийн төгсгөлд УИХ-ын гишүүн Ж.Батзандан дээрх сургууль, цэцэрлэгүүдэд тулгамдаж буй асуудлуудыг шийдвэрлүүлэх тал дээр холбогдох газруудыг шахаж шаардаж ажилана, үүнд та бүхний хяналт бас чухал гэдгийг сануулсан юм.
БЗД-ийн дээрх дөрвөн хорооны 6 сургуульд нийт 10 мянга гаруй хүүхэд, найман цэцэрлэгт 3000 орчим хүүхэд суралцаж, хүмүүжиж байна.
