Хууль зүйн байнгын хорооны өнөөдрийн хуралдаанаар “Гэр бүлийн хэрэг шүүхэд хянан шийдвэрлэх тухай хуулийн төсөл” болон хамт өргөн мэдүүлсэн хууль, тогтоолын төслүүд
-
Гэр бүлийн тухай /Шинэчилсэн найруулга/ хуулийн төсөл болон хамт өргөн мэдүүлсэн хуулийн төслүүд
-
Байнгын хорооны тогтоолын төсөл /Нэр дэвшигчийн томилгооны тов тогтоох, сонсгол даргалагчийг сонгох тухай/-ийг хэлэлцлээ.
Төрийн байгуулалтын байнгын хорооны гишүүн, УИХ-ын гишүүн П.Сайнзориг:
Энэ хууль их олон жил боловсруулагдаагүй юм. Өмнө нь нэг удаа өргөн баригдаад буцаж байсан. Дэвшилттэй зүйлс байгаа ч тодорхойгүй зүйлс хэд хэд байна.
Хүүхдэд нэр өгөхдөө ургийн овгийг мөн багтаадаг болсон. Гэтэл монголчууд ургийн овгийг маш замбараагүй авсан.
Жишээ нь Боржигон байна, бичилтийн хувьд янз бүр байдаг.
Уг нь Гэр бүлийн тухай хуулийн шинэчилсэн төсөлд ургийн овгийг дахин авч үзэх шаардлагатай байдаг ч, орхигджээ. Зарим нь сэтгэл хөөрлөөр улсын бүртгэл дээр очоод хүссэн овгийн нэрээ хэлээд авчихсан байх жишээний. Ургийн овгийг дагаж мөрдөх журмын хуулиар цэгцлээд цус ойртолтыг тодорхойлох, хүн ам зүйн бодлогын хувьд ач холбогдолтой байлаа.
Хоёрдугаарт, тээгч эхийн асуудал байна. Хэчнээн хүүхэд тээгч эхээс төрж байна, үүсэж байгаа эрх зүйн маргаан юу байна, ер нь өв залгамжлал дээр ямар онцлог зохицуулалт орсон бэ. Гэрлэлтийн гэрээний асуудал байна.
ХЗДХЯ-ны Төрийн нарийн бичгийн даргаар Н.Мягмар:
Энэхүү хуулийн төсөл болоод дагаж мөрдөх бусад хуулийн зохицуулалтад ургийн овгийн талаар оруулаагүй. Иргэн нэг удаа ургийн овгоо өөрчлөх боломжтой байдаг. Тээгч эхтэй холбоотойгоор, тухайн хүүхдийн эцэг эх байх эсэхийг нь гэр бүлийн тухай хуулиар тодорхой болгож өгсөн. Харин донорын тухай хуулиар гэрээ байгуулах зэрэг нь зохицуулагдаад явж байна.
