Хүүхдийн инээд цангинасан, баярын дуун цуурайтах хөгжилтэй өдөр, урин дулаан өдрүүдийг уриалан дуудсаар хаяанд ирлээ. Хөрш айлууд, хөөрөлдөх найзууд, хөгшин залуугүй ярилцах сонинтой, яриангүй бас зугаатай шинэхэн мэдээг дуулгая, шимтэн анхаарлаа хандуулна уу.
Хүүхдийн ертөнцөд өдөр бүр элдэв сонин хачин, хөгжилтэй үйл явдал дүүрэн тохиолддог. Түүнийг тэд бяцхан тархиндаа хэрхэн буулгаж авдаг нь, өөрийгөө бусдад хэрхэн ойлгуулахыг хичээдэг нь, тэр тусмаа энэ бүхнээ цаасан дээр үгээр хэрхэн буулгах нь үнэхээр сонин биш гэж үү. Энэ л орон зайд хамтдаа аялах, хүүхдийнхээ, дүүгийнхээ бичиж байсан хөгжилтэй бүхнийг дурсгалтай байдлаар хадгалан үлдээх, бусадтай хуваалцах таатай боломж гарч ирлээ.
Бухимдал дүүрэн нийгмийн асуудлыг хойш тавьж, буруутгах аргагүй бяцхан үрсийнхээ бодол сэтгэгдлийг хуваалцахаар undesten.mn вэбсайтын хамт олноос үзээд өнгөрүүлэхийн аргагүй, өөрийн эрхгүй тогтон саатах сонирхолтой хөтөлбөрийг эхлүүлж байна. “Хүүхэд аз жаргал авчирдаг” хэмээх энэхүү уралдаан нь хүүхдүүдийн дунд зохион байгуулагдах бөгөөд шилдэгийн шилдэг бичлэгийг шалгаруулан урамшуулна. Уралдаанд 15-аас доош насны бүх хүүхдүүд болон анги хамт олноороо оролцох боломжтой.
Ямар зарчмаар уралдах вэ гэж үү?
Мэдээж бяцхан хүүхдүүдийн өөрсдийн гараар бичсэн зохион бичлэг, аав ээж, ах эгч, дүүдээ зориулсан хөгжилтэй захидлуудыг хүлээн авах болно. Тэрхүү бичвэрүүдийг бид ч мөн олон нийтэд хүргэж, нийгэмд хөгжилтэй, эерэг, сайн сайхан уур амьсгалыг түгээхийг зорьж байна. Нөгөөтэйгүүр шударга зарчмын үүднээс бичвэр бүхнийг олон нийтэд танилцуулан хүргэх болно.
Яаж оролцох вэ гэж үү?
Захидал илгээж буй хүний нэр, утасны дугаар болон тухайн зохион бичлэг ба захидлыг, бичсэн хүүхдийн овог, нэрийн хамт info_undesten@yahoo.com хаягаар ирүүлнэ. Мөн бичлэгийг зурган хэлбэрээр баталгаажуулж илгээхээ мартуузай.
Яаж шалгаруулах вэ гэж үү?
Хөгжилтэй, адал явдлаар дүүрэн үйл явдлыг сийрүүлсэн бичвэрүүдээс нэгдүгээрт, хамгийн олон хандалт бүхий лайк, шэйрийг харгалзан үзэх болно. Харин эцсийн дүнг undesten.mn вэбсайтын хамт олон гаргах ба ирүүлсэн бичвэр, захидлуудаас хамгийн хөгжилтэйг нь сонгон шалгаруулан урамшуулна.
Урамшуулал, шагнал нь юу байх вэ гэж үү?
Тэгэлгүй яах вэ, энэ бол хамгийн чухал асуулт. Хүүхэд бүхэн бэлгэнд дуртай. Тэгвэл шилдэг 10 хүүхэд тус бүрт бэлэгтэй.
Шилдгийн шилдэг бичвэрийн эзэн – 200 мянган төгрөг+гарын бэлэг
Удаах шилдэг бичвэрийн эзэн – 100 мянган төгрөг+гарын бэлэг
Гуравдугаар байрын эзэн – 80 мянган төгрөг+гарын бэлэг
Дөрөв, тавдугаар байрын эзэн – тус бүр 50 мянган төгрөг+гарын бэлэг
Зургадугаар байрын эзэн – 20 мянган төгрөг+гарын бэлэг
7, 8, 9, 10 дугаар байрын дөрвөн хүүхэд тус бүр Зайсан Хилл цогцолборын Prime Cineplex кинотеатрт дуртай нэг киногоо үнэгүй үзэх эрх+гарын бэлэг.
Хугацаа нь хэзээ вэ гэж үү?
-Уралдаанд оролцох хугацаа 2018 оны 5 дугаар сар 1-нээс 31-ний өдрийг дуустал үргэлжилнэ. Энэ хугацаанд хүүхдийн бичсэн бичлэгээ явуулах боломжтой.
-Шагнал гардуулах хугацаа 2018 оны 6 дугаар сар 1-ний өдөр. Энэ өдөр ялагчаа тодруулах болно.
Ийнхүү багачуудын дунд зохион байгуулагдаж буй “Хүүхэд аз жаргал авчирдаг” хөтөлбөрийн шагналыг “Олон улсын хүүхдийн эрхийг хамгаалах өдөр” буюу “Хүүхдийн баяр”-аар “Зайсан Хилл” цогцолборын өмнөх талбайд зохион байгуулагдах “1000 хүүхдийн баяр” үйл ажиллагааны үеэр гардуулах юм. Энэ өдөр хүүхдэд зориулсан өөр бусад маш олон төрлийн хөгжилтэй, зохион байгуулалттай үйл ажиллагаанууд болно.
Нэг л өдөр болоод өнгөрсөн явдал гээд хүүхдийнхээ сэтгэл зүрхний бичээсийг үрэгдүүлэх гэж байгаа юм биш биз? Хэзээ нэгэн цагт үнэ цэнэтэй дурсамж бүтээнэ гэдэгт итгэж, үрийнхээ, дүүгийнхээ тэр л хөгжилтэй үгсийг бидэнд илгээж, хожмын хөгжилтэй түүхээ бүтээлцээрэй.
Холбоо барих : 9111-8045
