Монгол Улсын Ерөнхийлөгч Х.Баттулга Малайзын Холбооны Улсын Парламентын сонгуульд эвслээ тэргүүлэн ялалт байгуулж, улсынхаа Ерөнхий сайдаар дахин сонгогдсон Махатир Бин Мохамад баяр хүргэсэн захидал илгээсэн юм. Мөн тэрээр энэхүү захидалдаа Монгол Улсын иргэн Ш.Алтантуяаг Малайз улсад амь насыг нь бүрэлгэсэн хэргийг санууллаа.
Захидалд энэ талаар “Монгол Улсын Ерөнхийлөгчийн хувьд миний бие Монгол Улсын иргэн, хоёр хүүхдийн ээж Ш.Алтантуяагийн амь насыг 2006 оны 10 дугаар сарын 18-нд Малайз Улсад хөнөөсөн онц ноцтой гэмт хэргийн явцад онцгой анхаарал хандуулдаг юм. Энэхүү гэмт хэргийн улмаас манай хоёр орны харилцаанд, тэр тусмаа ард иргэдийн хооронд таагүй уур амьсгал бий болоод байгаа бөгөөд Эрхэмсэг ноён Ерөнхий сайд Та гэмт этгээдүүдийг шүүх, шүүхийн шийдвэрийг хэрэгжүүлэх, талийгаачийн ар гэрийнхний иргэний нэхэмжлэлийг шүүхээр шударгаар шийдвэрлэхэд анхаарал хандуулж, хоёр улсын харилцаанд үүссэн таагүй уур амьсгалыг илааршуулна гэдэгт найдаж байна.” хэмээн бичсэн байна.
Ш.Алтантуяа нь 2006 оны аравдугаар сарын 18-нд бусдын гарт амь үрэгдсэн юм. Малайзын шүүх Ш.Алтантуяаг хөнөөсөн цагдаагийн ажилтнууд болох Сирул Азхар Умар болон Азилах Хадри нарыг ялласан боловч олон асуулт хариултгүй үлдэж байлаа. Гэмт этгээдүүд хоёр удаагийн давж заалдах шатны шүүхээр ялгүй мултарч байсан юм. Харин 2015 оны нэгдүгээр сард Малайзын дээд шүүхээс хэргийг дахин хэлэлцээд анхан шатны шүүхийн шийдвэрийг сэргээж, Азилах Хадрийг цаазалжээ. Тэгвэл 2014 онд Австрали улс руу зугтаад интерполиор эрэн сурвалжлагдаж баригдсан Сирул Азхар Умарыг Малайзын шинэ ерөнхий сайд Махатир Мухамад шилжүүлэн авах хүсэлтийг тавьж магадгүй бололтой.
Ш.Алтантуяагийн эцэг С.Шаарийбуугийн нэхэмжлэлээр Малайзын Засгийн газрыг тус хэрэгт яллагдагчаар татах Давж заалдах шатны шүүхийн шийдвэрийг хянуулах хүсэлтийг Дээд шүүхэд гаргажээ.
Давж заалдах шатны шүүх өнгөрсөн оны наймдугаар сард Малайзын Засгийн газрыг яллагдагчаар татах хүсэлтийг буцаасан аж. С.Шаарийбуугийн өмгөөлөгчийн мэдээлснээр тэд ирэх зургадугаар сарын 6-нд Малайзын шүүхэд мэдүүлэг өгөх аж. Алтантуяагийн аав болон түүний хоёр хүүхэд болох Мөнгөншагай, Алтаншагай нар анх 2007 онд Малайзын шүүхэд зарга үүсгэсэн нь ийнхүү өдгөөг хүртэл үргэлжилж байна.
Хэргийн тухай товч сануулахад:
Монгол улсын иргэн орчуулагч, загвар өмсөгч Ш.Алтантуяа нь хэрэг гарах үед 28 настай байжээ. Тэрээр Малайзийн улс төр судлаач, Ерөнхий сайд асан Нажиб Разакийн ойр дотны хамтрагч Разак Багиндагийн нууц амраг байсан. Разак Багинда нь Нажиб Разакийн зөвлөх, үгийг нь бичиж өгдөг шадар туслах нь байжээ.
2006 оны аравдугаар сарын 18-ны өдөр түүний С4 тэсрэх бөмбөг зүүж дэлбэлж хороосон байсныг Селангор мужийн Шах Аламын алслагдсан ойгоос олсон. Талийгаачийн зүүж явсан үнэт чулуун шигтгээтэй ээмэг Азхар Омарын карманаас олдсон.
Ш.Алтантуяа нь 2002 онд Малайзийн Засгийн газар Франц улсаас 1.1 тэрбум ам. долларын өртөг бүхий шумбагч усан онгоц худалдан авах гэрээнд оролцсон гэдэг. Энэ нууц гэрээг Абдул Разах гэгч хариуцаж байжээ. Харин энэ хэрэг илэрч, улс төрчдийн дунд томоохон маргаан дэгдэж, Засгийн газар савлах болсноор гэрээнд оролцсон гэрч болох Ш.Алтантуяагийн “амыг барих” шаардлагатай болсон байна.
