Боловсрол суваг телевизээр үзэгчдийг байлдан дагуулж буй “Яг түүн шиг” нэвтрүүлгийн гурав дахь улирлын гурав дахь дугаар үзэгчдийн хүртээл боллоо. Энэ удаагийн оролцогчдыг эхний өдрөөс л нэлээд ширүүн өрсөлдөх нь хэмээн дүгнэж суусан үзэгчдийн хандлагад зарим өөрчлөлтүүд гарч эхлэв.
Өмнөх амралтын өдрөөр үзэгчид жүжигчин Тэмкаг дэмжин багагүй шүүмжлэл дэгдээсэн нь, энэ удаад түүнийг түрүүлэхэд нэлээд түлхэц болох шиг боллоо гэцгээж байна. Харин хичээлт нь хэтрүүлэг болоод байгаа бололтой оролцогч жүжигчин М.Цэрэндолгор буюу Цэдо нэг л явдаггүй. Түүний мэнгэ нь голлов уу гэлтэй, ялангуяа сүүлийн хоёр баззер хатуу даваа таарсныг хэлэх үү. Яг Jackson, Eminem хоёр шиг байна гэдэг боломжгүй мэт. Бэрх гэдгийг мэдсэн ч үзэгчдэд хүлээлт үүсч, үр дүн нь хангалтгүй ирэв. Түүнд янз бүрийн л шүүмжлэлийг илгээсээр. “Eminem-ийн онцлогийг яаж ингэж далчиганасан талаас нь харсан юм бол. Хортой алим өгөх гээд хэн нэгэнд өгөх гээд байгаа юм шиг харагдаж байна.” гэхчлэн хөвөрнэ. Мөн түүнийг дуулж дуусаад уурлаад, муухай царайлж суусан гэлцэв. Уг нь тэрээр дүрээсээ гарахгүйг хичээсэн биз ээ. Урлагийн хүн тайзан дээрээ, үзэгчдийн өмнө үнэн сэтгэлээсээ уурлаад сууна гэж юу байх билээ. Түүний мэнгэ нь голлож гэлцэх хэсэг байгаа бол сэтгэлийн дэм хайрлах, маш их хөдөлмөр зүтгэл орж байгаа гэдгийг үнэлэх олон ч байна. Тэд “Эмэгтэй хүн Eminem-ийг дуурайж үүнээс илүү яаж үглэх юм бэ. Эмэгтэй хүн гэхэд сайн үглэж.” гэнэ. Зарим нь нүүр хувиргагчдыг ч муу ажиллалаа гэж шүүмжлэх.
Өнгөрсөн жилийн шоунд С.Алимаад яг Eminem шиг болох баззер таарсан. Үзэгчид түрүү болон энэ жилийн Eminem-ийг харьцуулан дүгнэлт өгч байна. Хэн нь илүү дөхсөн байна вэ?
Харин Цэдо-гийн өмнөх үзүүлбэр Michael Jackson байсан. Жексонууд Монголын “Яг түүн шиг” шоуны тайзнаа нэлээд олон удаа гарсан байгаа. Та олж үзээд харьцуулаад дүгнээрэй. Хэн нь яг түүн шиг болох дөхсөн байна вэ?
Ийнхүү Цэдо, Энэрэл нарын оролцогчдыг өмнөх дугаарын Хишигдалай шиг “явахгүй төрлийн хүмүүс”-ээр тодорхойлж эхэллээ. Гэвч алдаагаа засаад, хэн хэрхэн ямар өөрчлөлт хийж, хэзээ гэнэтийн амжилт үзүүлэхийг бид таашгүй. Шоу дуусах болоогүй.
