ЦЕГ-ын хэвлэл мэдээллийн төвийн дарга, дэд хурандаа Б.Баатархүү өнөөдөр хэвлэлийн хурал хийлээ. Тэрбээр “Эрүүгийн цагдаагийн албаны Эдийн засгийн гэмт хэрэгтэй тэмцэх газрын мөрдөгч, ахмад М өөрийн шалгаж байсан хэргийн холбогдогчоос хахууль авсан байж болзошгүй хэргийг манай цагдаагийн байгууллага дотоод хяналт шалгалтаараа илрүүлж, хэргийг нь АТГ-т шилжүүлсэн. АТГ шалгаж байна. Он гарсаар сахилга хариуцлагын зөрчил гаргаж, цагдаагийн алба хаагчид дотооддоо дэг журам сайжруулах, хууль тогтоомж зөрчдөг аливаа асуудалтай тэмцэх ажлыг эрчимтэй өрнүүлж байгаа. Согтуугаар тээврийн хэрэгсэл жолоодсон замын цагдаагийн асуудлыг холбогдох хуулийн дагуу АТГ-т харьяаллын дагуу шилжүүлсэн. Бид дээрх мэт асуудалтай эвлэрэхгүй. Тэмцэж ажиллаж байна.
Энэ сарын байдлаар хар тамхитай тэмцэх хэлтэс 21 холбогдчтой найман хэргийг илрүүлэн шалгаж байна.2 018 оны тавдугаар сарын 04-05-нд шилжих шөнө хар тамхины хэргээр шүүхээс хорих ялаар шийтгүүлж байсан 48 настай Ч, 29 настай П-тэй хамтран хар тамхи хууль бусаар олж авч тээвэрлэж байхад саатуулан баривчилсан. 48 настай Ч нь 2018 оны хоёдугаар сард мөн хар тамхины хэргээр ял эдлээд гарч ирсэн бөгөөд дахин гэмт хэрэгт холбогдсон байна.Мөн 2018 оны тавдугаар сарын 22-ны өдөр хар тамхины төрлийн ургамалыг хууль бусаар гэртээ ургуулсан иргэн 23 настай Б, 28 настай П нарыг мөн гэрээс нь баривчилсан. 2018 оны тавдугаар сарын 25-ны өдөр Монгол Улсын иргэн О, 36 настай Т, А нарыг мөн хар тамхины хэргээр баривчилсан. Сэжигтэн Т,А нар мөн өмнө нь хар тамхины хэрэгт холбогдож байсан хүмүүс байгаа.
Энэ сарын 19-нд Сонгинохайрхан дүүргийн нутаг дэвсгэрт ноцтой зам тээврийн осол гарсан. Цагдаагийн алба хаагч, хурандаа осол гаргалаа гэсэн ташаа мэдээлэл олон нийтэд цацагдсан. Шалгаад үзэхэд 2007 онд тэтгэвэрт гарсан дэд хурандаа цолтой хүн байсан. Зам тээврийн осолтой холбоотой энэ асуудлыг цагдаагийн байгууллагаас хуулийн дагуу Сонгинохайрхан дүүргийн цагдаагийн хэлтэст шалгаж байна. Үүнд цагдаагийн алба хааж байсан хүн гэдэг утгаараа давуу эрх олгох гэх мэт асуудал байхгүй. Хууль тогтоомжид заасны дагуу шалгаж шийдвэрлэж, эцсийн шийдвэр гарсны дараа хэрхэн шийдвэрлэсэн талаараа та бүхэнд эргэн мэдээлэх болно.” гэв.
