Хятадаас импортлох 50 тэрбум ам долларын бараанаас 25 хувийн татвар нэмж хураахаа Америкийн засгийн газар 15-нд зарласны дараа, Хятадын тал Америкт үйлдвэрлэсэн 659 төрлийн 50 тэрбум ам.долларын импортын бараанаас 25 хувийн гаалийн татвар нэмж авахаа зарласан юм. Америк Хятадын эсрэг худалдааны сөргөлдөөн дэгдээсэн нь Америкийн хэвлэл мэдээллийн анхаарлын төвд орж, Америкийн чип, хөдөө аж ахуй зэрэг салбарынхан хатуу эсэргүүцэл тавьж байна.
Америкийн худалдааны яамны сайд асан Карлос Гутеррез Америкийн хэвлэлд өгсөн ярилцлагадаа “Америкийн тактик өдөр болгон өөрчлөгдөж, нэгдмэл байдал дутагдаж байна. Үүнд Америкийн худалдааны түншүүд сэтгэл амаргүй байна” гэжээ. Тэрээр мөн “Гаалийн татвар нэмж авах нь Хятадын дургүйцлийг хүргэх болно. Хэрэв Америкийн тал буруу үйлдлээ мужуудаар баримтлах юм бол Хятадын тал хариугаа авах болно. Хүмүүсийн эгдүүцлийг хүргэх худалдааны дайн ингээд дэгдэх болно” гэжээ.
Америкийн засгийн газар Хятадаас импортлох бараанаас гаалийн татвар нэмж авснаас болж Америкийн хагас дамжуулагч үйлдвэрлэгч компаниуд ч аргагүйн эрхэнд гаалийн татвар төлөх болно. Америкийн компаниудын Хятадаас импортолж байгаа олонх чипийн зураг төслийг Америк зохион бүтээж, заримыг нь Америк дотооддоо үйлдвэрлэж, Азийн бусад орнуудад аваачиж угсарч, туршин, сав баглаа боодол хийдэг байна. Америкийн татвар нэмэх арга хэмжээ эсрэг үр дүнд хүрэх болно гэж Америкийн хагас дамжуулагчийн нийгэмлэг үзэж байна.
“Wall street” сонин энэ сарын 15-нд Америк Хятад хоёр орон харилцан гаалийн татвар нэмж авах болсон талаар цуврал мэдээлэл нийтлэв. Үүнд нэгэн мэдээлэлд тэмдэглэхдээ “Америкийн тариаланчид шошоос гаалийн татвар нэмж авахгүй байхыг эрмэлзэж байна. Энэ оны шошийн 90 хувийг нэгэнт тариалчихаад байгаа тул хэрэв гаалийн татвар нэмж авахад хүрвэл Хятад улс Бразилаас авах шошийн хэмжээгээ нэмэх болно. Тэгвэл Америк өөрийнхөө шошийг экспортлох зах зээл хайхаас өөр аргагүйд хүрнэ. Өнгөрсөн жил Хятадын Америкаас импортолсон шош Америкийн шошийн нийт экспортын гуравны хоёр хувьд хүрсэн. Худалдааны дайнаас болж Америкийн шошийн экспорт тал хувиар буурах болно” гэжээ.
