“Цэнхэр үст” гэдгээр олонд танигдсан Э.Цэрэндолгор “Нүцгэн үнэн” нэртэй анхны уран зургийн үзэсгэлэнгээ өнөөдөр Монголын урчуудын эвлэлийн танхимд дэлгэлээ. Энэхүү үзэсгэлэнд түүний цорын ганц бүтээл тавигдсан. Түүний үзэсгэлэн сонирхохоор гэр бүл, дотны найз нөхөд болон багш нь хүрэлцэн ирсэн байлаа. Ингээд зураач бүсгүй өөрийн зурсан бүтээлийнхээ талаарх сэтгэгдлээ хэлсэн юм.
Тэрээр “Би 16 настайдаа Дүрслэх урлагийн сургуульд орж, 1992 онд төгссөн. Энэ сургуульд суралцаж байх хугацаандаа хүүхэдтэй болсон. Дүрслэх урлагийн сургуульд тийм сайн сураагүй, тааруу суралцсан. Багш маань намайг чирсээр байж төгсгөсөн. Энэ үеэс хойш нэг ч зураг зураагүй. 1993 оноос хувийн бизнес хийж эхэлсэн. Би долоон хоногийн өмнө гэнэт зураг зурмаар санагдсан. Энэ хугацаанд ямар зураг зурах вэ гэдэг маань санаанд байсан. Ингээд зургаа хоёр өдрийн дотор зурсан. Зургаа зүрсаны дараа Уран зургийн галерейн даргатай уулзаад ганц зургийнхаа үзэсгэлэнг гаргахаар болсон. Ирж үзэж байгаа хүмүүсийн хувьд ганц зураг байна гээд сэтгэл гонсгор байж магадгүй. Би энэ зургаа хөвгүүддээ хаяглаж зурсан. Зураг дээр байгаа үгнүүдээ хүүхдүүдээ зориулж бичсэн. Ингээд та бүхэнд бичсэн үгээ уншиж өгье.
…Ямар цаг үед ээжийн амьдарч байсныг миний хүүхдүүд хожим бүү мартаарай хэмээн энэ ил захидлыг бичиж байна.
Ээж нь өөрийгөө толинд харж зурахдаа өөрийн нүцгэн биеийг ихэд ажиглав.
Би та гурвыг эрүүл саруул өсгөх гэж ангир уургаа амлуулсан.
Миний хөвгүүд бусдыг бүү шоглож гадуурхаарай.
Шоглуулсан хүн их шархалж гэмтдэг юм аа.
Гэхдээ чин үнэнийг хаана ч хэлэх зоригтой байгаарай.
Нүцгэн ирээд нүцгэн буцах хорвоод төгс хүн гэж байхгүй.
Тиймээс бусдыг хүлцэн ойлгож уучлаарай.
Та нартаа хайртай цэнхэр үст ээжээс нь
Миний нүцгэн зураг твиттер хуудсаар цацагдсаныг олон хүмүүс шоолсныг та бүхэн мэдэж байгаа. Тэр дундаа намайг хүйс талаас нь доромжилсон. Би эмэгтэй хүн яагаад өөрийнхөөрөө байж болдоггүй вэ гэдгийг өөртөө байнга тавьж байдаг. Нэгэн цагт нөхөртөө зориулж авахуулсан зураг минь олон түмэнд ил болж твиттер хуудсаар цацагдсан. Намайг цэнхэр үстэй болохоор хүмүүс тэнэг гэж боддог. Энэ үгнүүдийг бичиж байх үедээ уйлсан. Би гэдэг хүн өвдөж шархалдаг. Энэ зураг миний нүцгэн зургийг интернетээр цацаж байгаа хүмүүст хариу болно гэж найдаж байна. Чаддаг юм бол энэ зургийг цааш нь түгээгээрэй гэж хэлмээр байна. Хүрэлцэн ирсэн та бүхэнд маш их баярлалаа” гэв. Ингэж хэлээд гурван хүүдээ зориулж зурсан зураг дээрээ гарын үсгээ зурсан юм.
