Сүүлийн үед УИХ-ын гишүүн Л.Оюун-Эрдэнийн ярьж байгаа “60 тэрбумын” гэх асуудал гол сэдэв болж, олон нийтийн дунд ихээхэн шуугиан дэгдээгээд байгаа билээ.
Л.Оюун-Эрдэнэ гишүүн энэхүү асуудлыг дахин шалгаж, холбогдох хүмүүст нь хариуцлага тооцуулахаар нийтийн дунд нээлттэй сонсгол хийхийг хүсч байгаа юм. Одоогоор 19 гишүүн түүний дэвшүүлсэн энэхүү саналыг дэмжиж гарын үсэг зураад байгаа бөгөөд үүнийг УИХ-ын дарга М.Энхболдод өргөн бариад байгаа юм. Гэхдээ УИХ-ын гишүүн Л.Оюун-Эрдэнэ уг асуудлын учрыг олох хүртлээ явна гэдгээ мэдэгдээд байгаа бөгөөд УИХ-ын дарга М.Энхболд үүнд нь ихээхэн таагүй хандаж байгаа нь нууц биш билээ. Тэгвэл өчигдөр МАН-ын бүлэг эл асуудлын талаар үдшийн 23:00 цаг хүртэл хуралджээ. МАН-ын бүлэг өдгөө толгойны өвчин болоод байгаа “60 тэрбум төгрөг”-ийн хэргээр олон цаг хуралдсаны эцэст ирэх долоо хоногт Байнгын хороогоор хэлэлцүүлэхээр шийдвэрлэсэн байна. Харин энэ хуралдааны үеэр Монгол улсын Ерөнхий сайд, МАН-ын дарга У.Хүрэлсүх хэлэлцэж байгаа асуудалтай холбогдуулан байр сууриа илэрхийлжээ.
Тэрээр уг хуралдааны үеэр “Би хувьсгал хийх гэж гарч ирсэн. Гэвч намын эв нэгдлийг бодоод нэг жил дуугүй явлаа. Одоо цаашид “60 тэрбум”-ыг өмөөрөөд сууж чадахгүй. М.Энхболд оо, чи ёс зүйн хариуцлага хүлээгээд наад ажлаа өг. Наад бичлэг чинь үнэн. Өнөөдөр шударга ёсыг тогтооход хамгийн их саад болж байгаа газар АТГ өөрөө болоод байна. Буруутныг хаацайлж байгаа. АТГ-ын даргыг ч өөрчилнө. Ингэлээ гээд та нар намайг огцруулбал огцруулна биз. Намынхандаа хандаж Онц их хурал зарлана. Ард түмэндээ хандаж дэмжлэг хүснэ” гэсэн байна. Харин УИХ-ын дарга М.Энхболд Ерөнхий сайд, МАН-ын дарга У.Хүрэлсүхийн үгийн хариуд “Би ажлаа зүгээр өгчихгүй ээ” гэж хэлжээ. Ийнхүү ирэх долоо хоногт Байнгын хороо уг асуудлаар хэлэлцэж, УИХ-ын дарга М.Энхболд албан тушаалтайгаа үлдэх, үгүйг шийдэх төлөвтэй байгаа юм байна.
