Монгол-Турк гэж танигдсан Эмпати сургуулиудын багш нар болон төгсөгчид, эцэг эхчүүд өнөөдөр Сүхбаатар дүүрэг дэх цагдаагийн I хэсэг дээр нэгэн ноцтой асуудлаар ханджээ. Энэ талаар тус сургуулийн Ерөнхий захирал Б.Ганбат мэдэгдлээ. Болж буй үйл явдлыг тодруулбал, тус сургуулийн Вейсел Акчай гэх захирлыг өнөөдөр өглөө 09:30 цагийн үед гэрээсээ гарахад нь гэрийнх нь гаднаас Starex маркын автомашинтай үл таних этгээдүүд хулгайлсан хэрэг гарчээ.
Энэ талаар Ерөнхий захирал Б.Ганбат цааш ярихдаа “Энэхүү хүн хулгайлах гэмт хэргийг ойрын хүмүүс нь ямар зорилгоор үйлдэж байгааг нь таамаглаж байгаа байх. Бид нарын хувьд Сүхбаатар дүүргийн цагдаагийн хэлтэс дээр ирээд зохих газарт нь мэдүүлгээ өглөө. Бидний авсан мэдээллээр 14:00 цагийн орчимд Турк улсаас жижиг оврын нисэх онгоц Чингис хаан буудалд буугаад 3-4 цагийн дараа буцаад нисэх юм байна. Тэгэхээр эндээс харахад энэ үйл явдал хэн гэдэг хүмүүс ямар зорилготойгоор хулгайлсан нь тодорхой байна.” гэлээ.
Ингээд тус сургуулийн төгсөгчид, багш ажилтнууд Чингис хаан олон улсын нисэх буудал дээр очиж байгаа юм байна. Мөн энэ хэргийг маш шуурхай илрүүлж, таслан зогсоохыг холбогдох хууль хяналтын байгууллагуудаас хүслээ.
Мэдээллийг цаг тухай бүрт нь хүргэх болно.
