Монгол-Туркийн сургуулийн захирал Вейсел Акчайг өнөөдөр гэрийнх нь гаднаас хулгайлагдсан байх магадлалтай талаар бид мэдээлсэн билээ. Түүний гэрийн гадаа хар өнгийн Starex маркын автомашинтай үл таних этгээдүүд түүнд бичиг үзүүлээд авч явсан гэнэ. /Дэлгэрэнгүйг ЭНДЭЭС үзнэ үү./
Энэ талаар Эмпати сургуулиудын захирал Б.Ганбат олон нийтийн сүлжээгээр мэдэгдсэн бөгөөд түүний хэлсэнчлэн Вейсел Акчайг үнэхээр Чингис хаан олон улсын нисэх онгоцны буудалд аваачжээ. Түүний өмгөөлөгч хэдийгээр нисэх буудал дээр ирээд байгаа боловч үйлчлүүлэгчтэйгээ уулзах боломж олгохгүй байгаа талаар эх сурвалж мэдээлж байна.
“Чингис хаан” олон улсын нисэх буудал дээр Турк улсын онцгой элчин сайдын онгоц газардаад байгаа нь энэ аж. Энэ онгоц буцаад 18:00 цагт хөөрөх хуваарьтай юм байна.
Нисэх буудалд 17:00 цагийн байдлаар УИХ-ын Хүний эрхийн дэд хорооны гишүүн Лу.Болд, ЗТХЯ, ИНЕГ, ХХЕГ, ГЕГ-ын холбогдох албаныхан ажиллаж байна. Харин Ерөнхийлөгчийн Тамгын газар, Засгийн газрын зүгээс ямар нэг тодорхой шийдвэр гаргаагүй байгаа аж.
Болж буй нөхцөл байдалтай холбоотойгоор Гадаад харилцааны яамнаас мэдээлэл хийнэ гэлээ.
