Нийслэлийн Баянзүрх дүүргийн Засаг даргын тамгын газрын дарга Б.Амартүвшинг өрөөнд нь хутгалсан хэрэг гарсан талаар бид мэдээлсэн. Энэ хэргийн талаар Цагдаагийн ерөнхий газрын хэвлэл мэдээллийн төвийн ажилтан М.Мөнхшүрээс тодрууллаа.
-Баянзүрх дүүргийн Тамгын газрын дарга Б.Амартүвшин өнөөдөр өрөөндөө хутгалуулсан хэрэг гарсан. Энэ талаар мэдээлэл өгнө үү?
-Өнөөдөр 10:40 цагийн үед Баянзүрх дүүргийн 13-р хороо, Баянзүрх дүүрэг дотор хүн хутгалууллаа гэсэн дуудлага мэдээлэл 102 утсанд ирсэн. Үүний дагуу Баянзүрх дүүргийн цагдаагийн нэгдүгээр хэлтсийн жижүүрийн бүрэлдэхүүн үзлэг шалгалт хийж ажиллалаа. Баянзүрх дүүргийн Тамгын газрын дарга албан тушаалтай иргэн А-г Баянзүрх дүүрэгт оршин суух хаягтай 64 настай иргэн И хутгалсан болохыг урьдчилсан байдлаар тогтоогоод шалгалтын ажиллагаа үргэлжилж байна.
-Хутгалуулсан хүний биеийн байдал ямар байна вэ?
-Иргэн А Цэргийн төв госпитальд яаралтай хагалгаанд орж хэвтэн эмчлүүлж байна. Юуны учир ийн хутгалах болсон шалтгааныг хохирогч болон холбогдогч нараас мэдүүлэг авсны дараа тогтоох учраас одоо мэдээлэл өгөх боломжгүй байна.
Турк сургуулийн захирлыг Гэрч хохирогчийг хамгаалах хэлтсээс хамгаалалтад авсан
-Өнгөрсөн долоон хоногт Турк сургуулийн захирлыг хулгайлахыг завдсан хэрэг гарсан. Энэ хэргийн шалгалтын ажиллагаа хийгдэж байгаа юу?
-Энэ сарын 27-нд Сүхбаатар дүүргийн хоёр дугаарын хорооны иргэнээс гадаад царайтай хүнийг үл таних нүүрэндээ маск зүүсэн гурван этгээд автомашиндаа хүчээр суулгаж авч явлаа гэсэн дуудлага мэдээлэл цагдаагийн байгууллагад бүртгэгдсэн. Энэхүү дуудлагын дагуу эрүүгийн цагдаагийн алба нийслэл цагдаагийн мөрдөн шалгах хэлтэс, Сүхбаатар дүүргийн цагдаагийн нэгдүгээр хэлтсийн ажлын хэсэг гарч ажилласан. Турк сургуулийн захиралтай холбоотой хэрэг дээр эрүүгийн цагдаагийн зохион байгуулалттай тэмцэх хэлтсээс эрүүгийн хуулийн 13.2.1 зааснаар хүнийг хулгайлах гэдэг зүйл ангиар хэрэг бүртгэл нээгээд мөрдөн шалгах ажиллагаа явуулж байна.
-Хулгайлахыг завдсан этгээдүүдийг баривчилсан уу?
-Тэргүүн дэд даргын баталсан ажлын хэсэг ажиллаж байгаа. Гурван этгээдийг олж тогтоосон зүйл байхгүй байна. Одоо шалгалтын ажиллагаа үргэлжилж байгаа.
-Турк сургуулийн захирал цагдаагийн хамгаалалтад байгаа юу?
-Гэрч хохирогчийг хамгаалах хэлтсээс хамгаалалтад авсан байгаа.
