МАН-ын Бага хурлын II хуралдаан үргэлжилж байна. Хурлын үеэр МАН-ын Ерөнхий нарийн бичгийн дарга Д.Амарбаясгалан мэдээлэл хийж, сэтгүүлчдийн асуултад хариуллаа.
Тэрээр “МАН-ын Бага хурлаар нөхөн сонгуульд оролцох тогтоолыг баталлаа. Маргааш СЕХ-нд бичиг баримтаа бүрдүүлж өгнө. Улс төрийн албан тушаал болон орон нутгийн түвшинд ажиллаж байгаа манай намын гишүүдээс 42 дугаар тойрогт нэр дэвших боломжтой олон хүн бий. Удахгүй нэр дэвшигчийг тодруулна. Одоогоор тус тойрогт судалгааны ажил үргэлжилж байна. Үндсэн хуулийн цэцээс 42 дугаар тойрогт нөхөн сонгууль явуулах тухай УИХ-ын тогтоолыг Үндсэн хуулийн зарим заалтыг зөрчсөн эсэхийг шалгаж байгаа. Бид энэ талаар Үндсэн хуулийн цэц болон СЕХ-ноос тайлбар авсан” гэлээ.
МАН-ын Хяналтын ерөнхий хороо өнгөрсөн баасан гарагт хуралдаж, “60 тэрбум”-ын асуудалтай нэр холбогдсон хүмүүст ёс зүйн хариуцлага тооцох шийдвэр гаргасан. Одоогоор намын удирдлагуудад уг шийдвэртэй холбоотой албан бичиг ирээгүй байгаа юм байна.
-МАН Хэнтий аймгийн 42 дугаар тойрогт ямар хүн нэр дэвшүүлэх байр суурьтай байгаа вэ?
-Хэнтий аймгийн 42 дугаар тойрогт нөхөн сонгууль зарласан үеэс эхлээд 42 дугаар тойрог дээр олон төрлийн судалгаа хийж ажиллаж байгаа. Манай нам 42 дугаар тойрогт ялах бүрэн боломжтой. Манай намаас нэр дэвших боломжтой хэд хэдэн хүний нэр судалгаагаар гарч ирж байгаа. Төрийн, орон нутгийн, нам улс төрийн түвшний хүмүүс байгаа. Гэхдээ нэр дэвших ажиллагаа есдүгээр сарын 4-нд болно. Үүнээс өмнө бид судалгаа хийж, ялалт байгуулах боломжтой намынхаа мөрийн хөтөлбөрийг хэрэгжүүлж, 42 дугаар тойргийн иргэдийг төлөөлөх боломжтой хүнийг нэр дэвшүүлнэ.
-Хяналтын ерөнхий хорооноос “60 тэрбум”-ын хэрэгт нэр холбогдсон хүмүүст хариуцлага тооцно гэж байсан. Бага хурлаар энэ асуудлыг хэлэлцэх үү?
-Хяналтын ерөнхий хорооны шийдвэрийг өнөөдөр авна. Үүнийг Ерөнхий нарийн бичгийн дарга ганцаараа шийдэхгүй. Хяналтын ерөнхий хорооны шийдвэрийг намын Удирдах зөвлөл, Бага хурал, шат шатны намын байгууллагын удирдлагын төвшинд ярьж байж, эцэслэн шийдвэрлэнэ. Ганц “60 тэрбум”-тай холбоотой асуудал гэхээсээ илүү намын гишүүний хувьд хариуцлага алдсан, нэр хүндээ улдаж байгаа, ёс зүйгээ ухамсралахгүй байгаа хүмүүстэй хариуцлага тооцно.
-Намын дарга нэр дэвшихгүй гэдгээ албан ёсоор илэрхийлсэн үү?
-Намын дарга нэр дэвшихгүй гэдгээ албан ёсоор илэрхийлээгүй байгаа.
-МАН дотроо хуваагдаад бие биенийхээ эсрэг нэвтрүүлэг хүртэл хийж байна. Намын дотоод зөрчлийн асуудал дээр намын удирдлага ямар байр суурьтай байгаа вэ?
-Хяналтын ерөнхий хороо хуралдаад энэ асуудал дээр анхаарлаа хандуулж ажилласан. Улс төрийн нам сонгуульд ордог, намаас нэр дэвшиж ялалт байгуулсан хүн намыг төлөөлж байгаа. Тиймээс намаас нэр дэвшиж ялалт байгуулсан хүмүүс намынхаа бодлогод удирдагдаж, намынхаа мөрийн хөтөлбөрийг хэрэгжүүлэхийн төлөө ажиллах ёстой. Намынхаа дотоод эв нэгдлийг хангахын тулд бид зарим алдаа дутагдлыг хэлэхгүй өнгөрч болохгүй. Нийгэмд бухимдал үүсгэж, олон нийтийн дургүйцлийг хүргэж байгаа намын гишүүдийн санаатай болон санамсаргүй гаргасан алдаа дутагдлыг засч урагшилна.
