Монгол улсын төр засаг хөл толгойгоо алджээ. Үүний нэг тодорхой жишээ нь энэ сарын 9-нд Монгол улсын нэгэн чухал яамны газрын дарга нар ажлын байрандаа архидан согтуурч, хоорондоо маргалдан зодолдсоны улмаас тус яамны нэг ажилтан амиа алдаж, өөр нэг газрын дарга нь уг хэрэгт сэжигтнээр татагдан шалгагдаж байна.
Мөн үүний хажуугаар ядархад яр гэгчээр яг тэрүүхэн мөчид Улаанбаатар-Сайншанд чиглэлийн вагон замаасаа гарч олон хүн хүнд бэртсэн золгүй явдал гарсан бөгөөд энэ бүхний эцэст Засгийн газраас эмгэнэл илэрхийлж, салбарын сайд, дэд сайд, газрын дарга нарыг ажлаас нь чөлөөлөх шийдвэр гаргалаа.
Өнөөдөр Монголын төрд ажилладаг төрийн албан хаагчид ёс зүйгүй, бүдүүлэг, харгис хэрцгий байдал үүсгэж байгаа нь эрх баригчид төрийн албанд хүн томилохдоо танил тал, мөнгө төгрөгөөр албан тушаалд томилдог уламжлалт заншилтай нь нягт холбоотой гэдэгтэй хэн ч маргахгүй байх.
Үүнд эрх баригч коммунист угшилтай гэгддэг МАН асар их буруутай гээд хэлчихвэл нэг их буруудсан болохгүй болов уу. Тус нам өнөөдөр намынхаа боловсон хүчнээ ч сонгон авч чадахгүй төрийн албыг мөнгөөр наймаалцдаг эд зүйл болгосныг хүн бүхэн мэднэ. Тэд өнгөрсөн он жилүүдэд төрийн албаны нэр сүр, төрийн хүндэтгэлийг шороотой хутгаж, ард түмнээр мөн ч их даажигнасан билээ. Өнөөдөр тэдний хийж буй үйлдэл, гаргаж буй шийдвэр бүр нь олон нийтийн элэг доог, эгдүүцэл зэвүүцлийг төрүүлээд зогсохгүй нэг мэдэхэд олон түмнийг хамарсан хувьсгалт жагсаалыг ч үүсгэн бий болгож болзошгүй болоод байна.
Мөн түүнчлэн өнөөдөр Монголын ард түмэн ийм хүмүүсээр төр засгаа удирдуулхаас залхаж байгааг хэлэх ёстой. Энэ үүднээсээ эрх баригч МАН болон тэдний энхрий хайрт 60 тэрбумын толгойлогч М.Энхболд тэргүүтэн энэ улс орныг удирдаж чадахгүй гэдгээ харуулж, нотолсоор байна.
Тэр утгаараа өдгөө эрх барьж буй УИХ-ыг тэр чигт нь тараахад огт буруудахгүй мэт санагдана. Яг үнэндээ бол тэд ЗТХЯ-д болсон саяын хэргийн дараа л холбогдох хүмүүст хариуцлага тооцно гэж байгаа болохоос өмнө нь хүчингийн болон хулгай дээрмийн, 60 тэрбумын гэх хэргүүдэд ямар ч ач холбогдол өгөхгүй “чаддаг юм бол булаагаад ав” гэж тохуурхан сууж байсныг ард нийтээрээ сайн мэдэж байгаа билээ. Тэгвэл үүнийг энгийн үгээр юу гэж хэлдэг вэ гэвэл “идээ бээр нь есөн сүвээрээ сад тавьж байна” гэж хэлдэг юм.
Сүүлийн үед болж буй дээрх гутамшигт явдлууд МАН-ын аль ч үед засаг барьж байх үед болж л байсан хэвийн үзэгдлүүд гэдгийг хэн бүхэн сайн мэднэ. Харамсалтай нь тэд өнөөдөр аанай л Монгол улсын төр засгаар даажигнаж, хариуцлагын тогтолцооноос зайлсхийсээр байна. Тийм болохоор Монголын ард түмэнд сонголт бага үлдсэн учир УИХ-ыг нэн даруй тарааж, нээлттэй шударга сонгууль явуулах нь ард түмний эрх ашигт нийцнэ хэмээн үзэж байна. Ийм арчаагүй төртэй байхыг ч Монголын ард түмэн огтхон ч хүсэхгүй.
