Сүхбаатар дүүргийн XII, XIII хорооны нутаг дэвсгэр 32-ын тойрог, автобусны буудал орчимд зөвшөөрөлгүй элс, хайрганы худалдаа, хүнд машин механизмын үйлчилгээ эрхэлж буй иргэн, аж ахуй нэгжүүдийг хамруулсан хяналт, шалгалт хийжээ.
Уг шалгалтыг дүүргийн Засаг даргын баталсан удирдамжийн дагуу ЗДТГ-ын Хүнс, худалдаа үйлчилгээний хэлтэс, Мэргэжлийн хяналтын хэлтэс, Газрын алба, Цагдаагийн 2 дугаар хэлтэс, Замын цагдаагийн хэлтэс, Онцгой байдлын хэлтэс, хороодын Ажлын алба хамтран хийж, иргэн, аж ахуй нэгж байгууллагад нийтийн эзэмшлийн зам талбайг чөлөөлөх хугацаатай мэдэгдэл хүргүүлсэн юм. Мэдэгдэлд, заасан хугацаанд газар чөлөөлөөгүй тохиолдолд Газрын тухай хууль, Зөрчлийн тухай болон бусад хууль тогтоомжийн дагуу арга хэмжээ авах юм байна.
Бүх тээврийн хэрэгслийн жолооч нарт мэдэгдэх хуудас хүргүүлсэн
Ингээд ажлын хэсэг ажиллаж байгаа Сүхбаатар дүүргийн XII хорооны нийгмийн ажилтан Д.Батхишигээс зарим зүйлийг тодрууллаа.
-Нийтийн эзэмшлийн зам талбайг чөлөөлөх ажил хэзээнээс хийгдэж хэлсэн вэ?
-Нийслэлийн засаг даргын өгсөн үүрэг даалгаврын дагуу манай дүүргээс ажлын хэсэг байгууллагдаад ажиллаж байна. 32 тойргийн орчмоор нийтийн эзэмшлийн зам талбайд зогсож, хүнд даацын машин механизмаар үйлчилгээ явуулж байгаа машин механизмыг чөлөөлөх ажил өнгөрсөн долоон хоногоос эхэлсэн.
Ажлын хэсэг өнгөрсөн долоон хоногт манай хороо дээр ирж, хүнд машин механизмаар үйлчилгээ явуулдаг иргэдэд мэдэгдэх хуудас хүргүүлсэн. Мэдэгдэх хуудас өгсний дараа XII хорооны Засаг даргын ажлын албанаас өдөр болгон цагдаагийн хэлтэстэй хамтарч нийтийн эзэмшлийн зам талбай дээр машин тавиулж бохирдуулахгүй байх тал дээр хяналт тавиад ажиллаж байна.
-Нийтийн эзэмшлийн зам талбай дээр нийт хэчнээн машин механизм зогсдог вэ. Үүнээс хэдэн машин механизмд мэдэгдэх хуудас хүргүүлсэн вэ?
-Бүртгэлтэй 38 машин механизм байдаг. Үүнээс тогтмол зогсдог 20 гаруй тээврийн хэрэгсэл байсан. Эдгээр тээврийн хэрэгслийн жолооч нарт мэдэгдэх хуудас хүргүүлсэн. Мэдэгдэх хуудас авсан машинууд зогсохгүй байгаа.
Харин мэдэгдэх хуудас аваагүй өөр дүүргээс ирсэн хүмүүс ганц нэг тээврийн хэрэгсэл зогсож байна. Бид мэдэгдэх хуудас аваагүй жолооч нартай биечилж уулзаад зогсоохгүй гэдгийг хэлж байгаа.
-Нийтийн эзэмшлийн талбай дээр зогсож үйлчилгээ явуулж байгаа жолооч нарт зөвшөөрөл байх уу?
-Ямар нэгэн зөвшөөрөл байхгүй. Нийтийн эзэмшлийн зам талбай дээр зогсож хувиараа үйлчилгээ явуулж байгаа бүх жолооч нар ямар зөвшөөрөл байхгүй. Нийтийн эзэмшлийн зам талбайд хүнд даацын машин механизмыг зогсохыг хориглож байгаа. Иймээс иргэд төрийн зүгээс хэрэгжүүлж байгаа ажлыг дэмжиж ажиллах хэрэгтэй.
-Жолооч нарын хувьд амьдралынхаа төлөө хэдэн төгрөг олохоор энд зогсож байгаа. Энэ жолооч нарт зогсох талбай зааж өгсөн үү?
-Жолооч нарт зогсох талбай зааж өгсөн байгаа. Энд орчин суудаг иргэдээс маш их гомдол санал ирдэг. Тухайлбал, Нийтийн эзэмшлийн зам талбай дээгүүр хүүхэд зорчход хүндрэлтэй байна. Мөн гудамж талбай бохирдуулж, дуу чимээ ихтэй байна гэсэн гомдол ихээр ирдэг.
-Жолооч нар зааж өгсөн талбай дээр зогсож байгаа юу?
– Хүнд машин механизмтай жолооч нарт XIII хорооны далан дотор зогсох талбай зааж өгсөн байгаа. Харин жолооч нар тэр талбайгаа голоод зогсохгүй байгаа. Хүмүүсийн нүдэнд ил зогсохгүй болохоор үйлчлүүлэгч ирэхгүй байна гээд байгаа.
