ОХУ-ын Владивосток хотноо Дорнын эдийн засгийн IV форум өнөөдөр эхэллээ. Форум есдүгээр сарын 11-13-ны өдрүүдэд үргэлжлэх юм. Хятад улсын дарга Ши Жиньпин, Зүүн Хойд Азийн олон орны төр засгийн тэргүүн, 60 гаруй улс орны төлөөлөгчид хуралд оролцож байна. Манай улсын Ерөнхийлөгч мөн хойд хөршийг зорин Владивосток хотын олон улсын нисэх онгоцны буудалд газардлаа.
Дорнын эдийн засгийн форумыг ОХУ-ын ерөнхийлөгч В.Путин 2015 онд санаачилж хийсэн бөгөөд энэхүү санаачлага нь Орос ба Америк, Европын харилцаа муудсан үед Дорно дахинд анхаарал хандуулсан шийдвэрийн нэг юм.
Оросын Дорно зүгт хандсан энэ бодлогыг өрнийнхөн эдийн засгийн хоригийн дарамтаас болж гаргасан түр зуурын бодлого гэж үзсэн бөгөөд өрнийн зарим хэвлэл энэ бодлогыг “Орос үүнээс өөрийнхөө ирээдүйг харж чадах уу” гэж ёжилж байлаа. Гэвч сүүлийн хэдэн жил Оросын дорно дахинд хандсан бодлого эрчимжихийн хэрээр Оросын урт хугацааны үндэсний стратегийн онцлог харагдах болжээ.
ОХУ дорныхонд хандсанаар Хятад, Оросын хамтын ажиллагаанаас маш их ашиг гарахыг олж харжээ. Оросын худалдааны хамгийн том түнш орны хувьд, 2015 оны Дорнын эдийн засгийн анхны форумаас эхэлж, Хятад улс жил бүр олон тооны дээд төлөөлөгч томилон оролцуулсан юм. Энэ удаад Ши Жиньпин дарга тус форумд оролцсон нь Хятадын төрийн тэргүүний Алс Дорнодын эдийн засгийн форумын талаарх анхны үнэлгээ боллоо. Энэ нь Хятадын тал Алс Дорнодын хамтын ажиллагаанд оролцоход бэлэн байгаа идэвхтэй байр суурийн илэрхийлэл аж.
ОХУ ингэж хандсанаар Зүүн Хойд Азийн бүсийн хамтын ажиллагааны шинэ орон зайг олж харжээ. Дорнын эдийн засгийн форумыг гурван удаа амжилттай зохион байгуулснаар Зүүн Хойд Азийн бүсэд идэвхтэй нөлөө үзүүлж, өнгөрсөн жилийн форумаар нийт 2.5 их наяд рублийн гэрээ байгуулсан бол энэ онд 3.5 их наяд юаньд хүрэх төвөлтэй байгаа юм байна.
ОХУ дорно зүгт хандсанаар, Ази Номхон далайн эдийн засгийн хурдтай хөгжил илүү их боломж нээх нь тодорхой болж байгаа юм. Алс Дорнод байгалийн асар их баялагтай учраас “дэлхийн цорын ганц эрдэнэсийн сан” гэгддэг. Харин эдийн засгийн өсөлт удааширсан, дэд бүтэц хоцронгуй, хүн амын шилжилт ноцтой байгаа зэрэг асуудлаас болж, энэ “эрдэнэсийн сан” өнөөг хүртэл стратегийн ач холбогдол, эдийн засгийн үнэ өртгөө гүйцэд гаргаж чадаагүй юм. Зүүн, баруун нутгийг тэнцвэртэй хөгжүүлэх стратегийн дагуу сүүлийн жилүүдэд ОХУ Алс Дорнодыг нээн хөгжүүлэх ажлыг эрчимжүүлж, үндэсний стратегийн өндөрлөгт хүргэсэн байна.
Орос “Дорно дахинд хандаж” байгаа нь Өрнөдийн орнууд ОХУ-д хориг тавьсанд бус, Өрнөдийн орнуудтай харилцаа муудсан явдал нь Оросын Дорно дахинд хандах үйл явцыг эрчимжүүлсэн юм. Гэлээ ч гэсэн Европ тив Оросын худалдааны чухал түнш хэвээр байна.
