Беларусь улсын хилийн цэргийн алба хаагчид тус улсын хилийг зөрчих гэж байсан монгол улсын хоёр иргэнийг энэ сарын 24-нд саатуулжээ. Тэдгээр иргэд нь Брестийн районы газар нутгаар дамжин Польш руу нэвтрэх үүднээс тосгон суурингуудыг тойрон хилийн зурвас өөд явж байхад нь тэднийг Беларусийн “Теребунь”хилийн заставын хилчид илрүүлэн саатуулсан байна.
Шалгалтын явцад дээрх саатуулагдсан гэр бүлийн хоёр хүний нэг нь болох эрэгтэй нь Монгол улсын төрийн албан хаагч гэж тус улсын хилчдэд мэдүүлжээ. Монгол залуугийн өгүүлснээр тэд эх орондоо хууль бус үйлдэл хийн тэр нь Монголын хууль хяналтынхны анхааралд өртсөн тул эхнэрээ дагуулан ийнхүү хил даван зугтахаар шийдсэн гэнэ. Брестийн хилийн албаны албан ёсны төлөөлөгч Сергей Дмитриевийн мэдээлснээр одоогоор саатуулагдсан хоёр иргэнийг түр хорих газар хориод байгаа бөгөөд тэдний зорилго нь Беларусь, Польшоор дамжин Европын холбооны улсуудад нэвтэрч, Германд амьдарч буй хамаатнууд дээрээ очих явдал байсан ажээ. Монгол улсын дээрх иргэдийг Беларусь улсад нэвтрэх эрхийг нь таван жилээр хасч, тус улсаас албадан гаргаж, Монгол улсад шилжүүлнэ хэмээн Беларусийн “ОНТ” телевизийн мэдээлсэн байна.
