УИХ дахь МАН-ын бүлэг өнөөдөр хуралдлаа. Хурлын дараа МАН-ын бүлгийн дарга Д.Хаянхярваа мэдээлэл хийв. Тэрбээр “Өнөөдөр МАН-ын бүлэг гурван асуудлаар хуралдлаа. Нэгдүгээрт, Төсөв өргөн барьсантай холбогдуулан ажлын хэсэг байгуулав. 2019 оны төсөв гэдэг бол нэлээн хариуцлагатай төсөв. Үндсэндээ Засгийн газрын үйл ажиллагааны хөтөлбөрийг шийдвэрлэх он бол 2019 он. Тиймээс нухацтай ажиллах ёстой гэж үзэн УИХ-ын гишүүн Д.Оюунхоролоор ахлуулсан 11 хүний бүрэлдэхүүнтэй ажлын хэсэг байгууллаа.
Хоёрдугаарт, Үндсэн хуулийн цэцийн дүгнэлтийн буюу Хэнтий аймгийн 42 дугаар тойргийн асуудал байлаа. УИХ-аас гаргасан шийдвэрийг Үндсэн хуулийн цэц зөрчсөн гэж үзэхгүй байгаа. Тиймээс цэцийн дүгнэлтийг хүлээн авах боломжгүй гэдэгт бүлгийн гишүүд санал нэгдэж, улстөрийн шийдвэр гаргалаа.
Гуравдугаарт, өнгөрсөн хугацаанд бүлгийн гишүүд тойрогтоо ажилласан. Тойрогтоо ажиллахад ард иргэдийн амьдрал ахуй ямар байна. Ард түмэн юу хүсч байна. Ямар зүйлийг төр засгаас шаардаж байна гэдгийг ярилцахаар боллоо. Төсөвт ямар боломж байна. Боломж байвал асуудлыг шийдье гэх шийдэлд хүрсэн. Эцэст нь Ерөнхий сайд У.Хүрэлсүх ЗТХ-ийн сайдыг энэ долоо хоногтоо багтааж чөлөөлж, орны хүнийг нь томилох асуудлыг хэлэлцэнэ гэдгээ танилцуулсан” гэлээ.
Мэдээллийн дараа МАН-ын бүлгийн дарга Д.Хаянхярваа зарим зүйлийг тодрууллаа.
-Зам тээвэр хөгжлийн сайдыг УИХ дотроос байх уу. Таныг сайд болно гэх юм. Энэ үнэн үү?
-МАН-ын Удирдах зөвлөлөөр хэнийг томилох талаар ярилцана. Зам тээвэр, хөгжлийн сайдыг энэ долоо хоногт чөлөөлнө. Өөрөө өргөдлөө өгсөн учраас шийдээд явна. Улстөрч хүн улс төрийн хариуцлагаа хүлээе гэж байгаа учраас энэ дагуу шийдээд явна. Энэ бол цэвэр улс төрийн хариуцлагын асуудал.Зам тээвэр хөгжлийн сайдыг тэндээс эндээс томилно гэсэн асуудал бүлгийн хурлаар яригдаагүй. Би Зам тээвэр, хөгжлийн сайдаар ажиллахгүй.
-Одоогийн бүх алдаа системийн хямралтай холбоотой гэдэг. Энэ тухайд?
-Системийн хямралыг хайвал 27 жилийн түүхийг эргэж харах хэрэгтэй байх. Үндсэн хуулийн өөрчлөлтэй холбоотойгоор засч залруулах зүйл бий. Ажлын хариуцлага ярьж байгаа үед аливаа асуудлыг шийдэхдээ зөв шийдэх үү, улс төрөө харж шийдэх үү гэдгээ харах ёстой. Гол алдаа системдээ биш улстөрчдөдөө байна.
-Сонгуулийн тухай хуульд намрын чуулганаар өөрчлөлт оруулна. Ямар өөрчлөлтүүд орох юм бол?
-Сонгуулийн тухай хуулийг өөрчлөхөөр УИХ-ын даргын захирамжаар ажлын хэсэг байгуулагдсан. Ерөнхийлөгчийн, орон нутаг, УИХ-ын сонгуулийг салангид хуулиар явуулна. Сонгуулийн тогтолцоог бас ярилцана.
-Намрын чуулганаар Үндсэн хуулийн өөрчлөлтийг хэлэлцэж амжих уу?
-Үндсэн хуулийн өөрчлөлтийг 2024 оноос хэрэгжүүлэхээр ярьж байна. Хуулийн өөрчлөлтийг хэлэлцэнэ. Өнгөрсөн хоёр жилийн хугацаанд хангалттай санал асуулга явуулсан. Давхардсан тоогоор сая гаруй хүний санал иржээ. Тодорхой саналууд ирээд хэлэлцүүлгийн шатанд явж байгаа. Хуулийн өөрчлөлтийг хэдийд хэлэлцэх вэ гэдгийг ярилцах ёстой байх. Үндсэн хуулийн өөрчлөлтөөр Засгийн газар, Ерөнхий сайдын эрх мэдлийг нэмэгдүүлэх чиглэлд явж байгаа. Ерөнхийлөгчийн эрх мэдлийг нэмэгдүүлэхээр өнгөрсөн хугацаанд 40 гаруй хуульд өөрчлөлт оруулж байжээ. Аливаа асуудалд хандахдаа улсын эрх ашгийн төлөө нэн түрүүнд шийдвэр гаргах хэрэгтэй. Манайх шиг хүн ам цөөтэй улсад Ерөнхийлөгчийн засаглал тохирохгүй гэж үздэг. Энэ бол дарангуйллыг бий болгоно гэж би хувь хүнийхээ хувьд үзэж байна.
-Улс төрийн намын санхүүжилтийн тухай хуулийг хэлэлцэж амжих болов уу?
-Намуудын санхүүжилт ямар байх вэ гэдгийг тодорхой болгоно. Нийгэмд өнөөдөр хамгийн их бухимдал төрүүлж байгаа зүйл бол улс төрийн нам болжээ. Тиймээс улс төрийн намын санхүүжилтийг шилэн болгох ёстой. Тэр утгаараа энэ хуулийн төсөлд маш нухацтай хандаж, ажиллана.
