Яг жилийн өмнө утааны нөхцөл байдлаас Онц байдал тогтоох тухай яриа гарч(тэр нь 2017 оны арванхоёрдугаар сарын 26-28-ны үед), Ерөнхийлөгч УИХ-ын даргад бичиг явуулж, УИХ-аар уг асуудлыг хэлэлцэж байжээ.(2018 оны нэгдүгээр сарын 5-ны өдөр)
Гишүүд тэгэхэд утааны эсрэг хийх ажлын төсвийг нэмэх, төвлөрлийг бууруулах, утааны эсрэг үндэсний хөтөлбөр хэрэгжүүлэх гэх зэргээр ээлжлэн үгээ хэлж, зарим нь утаанаас үүдэлтэйгээр Онц байдал зарлах хуулийн заалт үгүй гэснээр хэлэлцүүлэг дуусч байж. Хэвлэл мэдээллийн хэрэгсэлүүд ч дээрх санааг агуулсан мэдээллүүдийг тавьж байсан аж.
Монгол Улсын Онц байдлын тухай хуульд Онц байдал зарлах хоёр нөхцлийг дурьдсан байх бөгөөд эхнийх нь бол:
“1/ улсын нийт нутаг дэвсгэрт буюу зарим хэсэгт нь оршин суугаа хүн амын амь нас, эрүүл мэнд, аж амьдрал, нийтийн аюулгүй байдалд шууд аюул учруулсан буюу учруулахуйц гамшиг, аюулт үзэгдэл, осол тохиолдсон;” үед гэж заажээ.
УИХ-ын эрхэм гишүүд ээ!
Энэ заалтыг дахин нэг уншаад өгөөч!
Ордноосоо гараад оройн цагаар гадуур жаал яваатхаач!
Энэ байдал одоо ГАМШИГ биш үү?
АЮУЛТ ҮЗЭГДЭЛ БИШ ҮҮ?
ХҮН АМЫН АМЬ НАС, ЭРҮҮЛ МЭНД, АЖ АМЬДРАЛД ШУУД АЮУЛ УЧРУУЛААГҮЙ байна уу?
Бие биедээ шидэх мэдэгдлээ, хэн нэгнийг дагасан талцлаа, сайд болох хүслээ, шударга ёсны баатар болох тэмцлээ түр орхиод, ойрын өдрүүдэд оролцох шинэ жилийн баярын урилгуудаа хажуу тийш тавьж байгаад яг одоо, гадаа чинь, хүн ард утаан дунд хэрхэн сүйрч байгааг нэг анзаараатхаач!
ОНЦ БАЙДЛЫН ТУХАЙ ХУУЛЬД:
“5 дугаар зүйл. Онц байдал зарлах
1.Үндсэн хуулийн хорин тавдугаар зүйлийн 2 дахь хэсэгт заасан онцгой нөхцөл Улсын Их Хурлын ээлжит болон ээлжит бус чуулган чуулж байх үед бий болсон бол Улсын Их Хурал онц байдал зарлах тухай асуудлыг Монгол Улсын Ерөнхийлөгч, Засгийн газар, эсхүл Улсын Их Хурлын нийт гишүүдийн дөрөвний нэгээс доошгүйн санаачилгаар хэлэлцэж шийдвэрлэнэ.” гэжээ. Та нарт эрх нь байна. Энэ эрхийг сонгогчид та нарт өгсөн. Гэхдээ одоо гуйж байна. Нэг юм хийгээч!
