Өнөөдөр Монгол улсын хоёр дархан аваргаар тойлгойлуулсан талууд уулзаж зөвшилцөлд хүрсэн гэнэ. Монгол улсын Үндэсний бөхийн холбооны тэргүүн, УИХ-ын гишүүн, Дархан аварга Б.Бат-Эрдэнэ болон Монгол улсын Дархан аварга Х.Баянмөнх нар бөхчүүдийн түр зөвлөлийг байгуулж, яаралтай Бөхийн өргөөний үйл ажиллагааг хэвийн явуулах тал дээр санал нэгджээ. Энэхүү уулзалтад холбооны дэд тэргүүн Ц.Магалжав, Гүйцэтгэх захирал Б.Сайнбаяр нар оролцсон байна.
Х.БАЯНМӨНХ: Бөхийн өргөөндөө орж барилдах бөхчүүд нь бэлтгэлээ хийхэд бэлэн байдаг. Бөх сонирхогчид нь бөхийн барилдаанаа өргөөндөө үзэхээр хүлээж байна. Тэгэхээр энэ зүйл дээр их цаг алдаад байгааг бөхчүүд хэлж байна. Энэ асуудлыг чи бид хоёр шийдэх хэрэгтэй болж байна. Өнөөдөр хоёулаа ярилцъя. Шүүхээр явдаг асуудал нь явж байг. Бөхийн өргөөг нээж, барилдааныг хийе. Бөхчүүдийн түр зөвлөл байгуулъя. Бид хоёрын хувьд бие биенээ дэмжиж явсан шүү дээ. Энэ асуудал дээр эвлэрээд санал нэгдэж байгаад би баяртай байна. Би энэ тавьсан саналыг зөвшөөрч байна. Олон нийт болон цагдаагийн байгууллага нь дэмжих байх. Бөхийн өргөө хаалттай биш нээлттэй байх хэрэгтэй байна. Өнөөдөр энэ ажил цэгцтэй болчихвол болох гээд байна. Гараад цагдаад хэлье. Өнөө орой хоёулаа тамирчдын шагнал гардуулах “Бөртэ чоно” арга хэмжээн дээр уулзахдаа Өргөөгөө нээчихсэн уулзвал сайхан байна.
Б.БАТ-ЭРДЭНЭ: Таньтай санал нэг байна. 2018 оны гуравдугаар сард Бөхийн холбооны наймдугаар “Их Эе” хуралдаад бөхчүүдийн 80 орчим хувь нь ирсэн. Энэ хурлаас намайг Тэргүүнээр сонгож, та энэ маргаантай байгаа асуудлыг цэгцлэх хэрэгтэй байна гэсэн. Ингээд би энэ асуудалд ороод явж байна. Энэ хурлын маргаашаас нь би хэлэхдээ “Санал нийлдэггүй нөхдүүдтэйгээ уулзаж, хамтраад ажиллах талаар ярилцъя” гэсэн. Мөн өнгөрсөн зун Үндэсний телевизийн нэвтрүүлэгт орж, хэдүүлээ ярилцсан байгаа. Есдүгээр сарын эхээр хурлаа хийх талаар тохиролцсон. Олон түмний хүсэлд нийцүүлээд Бөхийн өргөөгөө нээх тал дээр санал нэгдэж байгаад баяртай байна. Та бид хоёр бөхийн дэвжээнд ах, дүүс шиг явлаа. Одоо Өргөөний хаалга үүдийг өшиглөх, мөн эвгүй байдал гаргаад байдаг зүйлийг болиулах хэрэгтэй байна. Хоёулаа энэ холбооныхоо тэргүүнд сууж байгаагийн хувьд энэ асуудлыг нааштай шийдэж, шийдвэр гаргая. Тамирчдынхаа баярын өдөр хоёулаа Өргөөгөө нээчихвэл сайхан байна.
