Хүн янз бүрийн шалтгаанаар ажил хийдэг. Амь зуух, хамт олонтой болох, ажилдаа дуртай учраас, хорвоо ертөнцөд хэрэгтэй зүйл хийж бүтээхийн тулд, амьдралын баталгаатай болохын тулд гээд л…
Амьдралын ямар нэгэн шалтгааны улмаас хүн болгон шахуу ажил хийдэг нь үнэн. Харин та гэрээсээ гадна хамгийн их хугацааг өнгөрүүлдэг газартаа таагүй уур амьсгал үүсгэж, стресс бухимдалтай байхыг хүсдэггүй биз дээ? Тэгвэл бид танд ийм алдаа гаргахгүй байхын тулд ажил дээрээ хэзээ ч хэлж болдоггүй үгсийг танилцуулж байна. Үүнийг анхаарч, өөрийнхөө эргэн тойронд эерэг уур амьсгалыг бүтээгээрэй.
Ажил дээрээ хэзээ ч хэлж болохгүй үгс
“Ингэж л хийдэг байсан шүү дээ”
-Хүмүүс өнгөрсөн туршлагаа ихэд чухалчилдаг. Гэвч цаг үе өөрчлөгдөн шинэчлэгдсээр байна. Тиймээс шинэ санаачлагыг үгүйсгэх нь утгагүй юм. Өөрөөр хэлбэл таны хуучинсаг байдал хамт олонд тань эвгүй сэтгэгдэл төрүүлж магадгүй юм. Түүний оронд яагаад шинэ арга хэрэглэх болсон бэ гэдгийг надад тайлбарлаж өгнө үү гээд асуучихвал тун оновчтой.
“Цааш нь чадахгүй нь”
-Таны хүч чадал барагдаж, толгой ажиллахгүй болчихоод хэцүү байна уу. Тэглээ гээд бусдыгаа уруу татах хэрэг байна уу. Түүний оронд “би чадна” гээд өөрийгөө зоригжуулбал “чадахгүй” гэж хэлэн толгой сэгсэрч сууснаас хавь илүү үр дүн үзүүлсэн байх болно. Үнэхээр болохгүй, таны хүч хүрэхгүй байгаа бол хамт олноосоо тусламж гуйгаад үз. Хамтын хүч амжилтын үндэс гэдэг дээ.
“Юу байх вэ, Гялс хийчихнэ”
-Яг үнэндээ амьдрал дээр гялс хийчихдэг юм гэж тун ховор. Бүгд л цаг зав, хөдөлмөр шаарддаг. Ажлын хамт олон чинь өдөржин, бүтэн долоо хоног, сарын турш махран ажиллаж байхад та хэнэгч үгүй “юу байх вэ. гялс хийчихнэ” гэж тэдний хөдөлмөрийг үнэгүйдүүлж болохгүй. Танд хялбар санагдаж байгаа зүйл хэн нэгэнд дарамт болж байхыг үгүйсгэхгүй. Тиймээс та үнэхээр гялс хийчихнэ гэж бодож байгаа ч үүнийгээ шууд илэрхийлэхийн орон “би хийе, ойлголоо, би хийх болно” гэх мэт үгсээр оруулаад үзвэл ямар вэ?
“Шал утгагүй юм”
-Хүн мэдэхгүй, мэдэхийг хүсэхгүй, эсвэл өөрийнхөө алдааг хүлээн зөвшөөрөхгүй байгаа үедээ дээрх үгийг хэлэх нь элбэг. Яагаад … Бусдад утгатай зүйл таньд яагаад утгагүй санагдаад байгаа юм бэ. Үүнийг өөрөөсөө асууж үзсэн үү. Үгүй бол цаашид энэ үгийг хэлэхээсээ өмнө яагаад надад утгагүй санагдаад байна вэ гэж асууж байгаарай. Хариулт нь олдохгүй бол хамт олноосоо ичилгүйгээр “яагаад” гэдэг асуултыг асуучихаж бай. Шал утгагүй юм гэж тэдний байр суурийг үгүйсгэснээс хавь илүү байх болно.
“Завгүй байна”
-Үнэхээр ажил ихтэй байхад хэн нэгэн тусламж хүсвэл “завгүй байна” гээд хэлчихдэг. Гэвч ингэж хэлснээр хувиа хичээсэн, багаар ажиллахыг хүсдэггүй, зожиг … гэх мэт ойлголтыг нөгөө хүндээ төрүүлэх нь бий. Тэгвэл “Уучлаарай би яг одоо ажилтай байна. Ажлаа дуусгаад танд туслая” гэдэг хариулт танд ч, нөгөө хүнд ч эерэг сэтгэгдэл төрүүлнэ. Туршаад үзээрэй.
“Чиний буруу”
-Энэ бол тун бүдүүлэг үг юм. Үнэхээр таны хамтран ажиллагчийн буруу байж болно. Тэглээ гээд та олны нүдэн дээр түүнийг шууд буруутгаж болохгүй. Хамт олны харилцааг муутгахаас гадна, тантай дахин өөрийн үзэл бодлыг хуваалцах нөхөр олдохгүй болно. Хүн бүр л алддаг. Чухам хаана ямар алдаа гаргачихсан бэ гэдгийг тодруулах нь зөв. Тиймээс “энэ удаа алдаа гаргасан бололтой. Дараагийн удаа битгий алдаа гаргаарай. Мөн энэ удаагийн алдаагаа түргэн засна гэдэгт итгэж байна. Чи чадна” гэх үгсээс алдсан нөхрөө урамшуулаарай.
“Уучлаарай”
Уучлалт гуйх нь зөв. Гэхдээ цаг үеээ мэдрэх хэрэгтэй. Хэн нэгний ажлыг алдагдуулчихаад зүгээр л уучлаарай гээд өнгөрөх нь зохимжгүй. Боломжтой бол дахин ийм алдаа гаргахгүй гэдгээ учирлаж, чин сэтгэлээсээ уучлалт гуйх хэрэгтэй. “За чи ч бас алдаа гаргадаг биз дээ” гээд занаад өнгөрч болохгүй шүү…
“Би хамаг чадлаараа зүтгэж байна”
Дандаа л бүтэмжтэй, сайн сайхан байна гэж юу байх вэ. Хамаг чадлаараа зүтгээд байхад бүтэлгүйтэх өдрүүд цөөнгүй. Тэглээ гээд өөрийн бүтэлгүйтлийг бусдад халдаах хэрэг байна уу. Тэрний оронд дараагийн гарах алдааг урьдчилан таамаглаж, түүндээ хамаг чадлаа зориул. Шантарч, бууж өгч байгаагаа бусдад харуулах тийм ч тохиромжтой биш шүү.
“Миний буруу байж магадгүй. Гэхдээ … “
Гэхдээ гэдэг үгийн араас сөрөг дайралт буюу хамтрагчаа эвгүй байдал оруулахуйц үгс эхэлдэг. Өөрийн байр суурийг хамгаалах нь зөв. Гэсэн хэдий ч бусдыг эвгүй байдалд оруулах нь тийм ч таатай байдлыг бий болгодоггүй. Тэгэхээр “надад нэг санаа байна” гээд өөрийн байр суурийг илэрхийлэх гээд үз. Энэ нь хэн нэгэн рүү чиглэсэн бус харин ч гарч буй алдааг засахаар таны дэвшүүлж байгаа санаа гэдэг нь бусдад шууд ойлгогддог.
“Цаг гарсангүй”
Энэ үг таны удирдлагуудад тийм ч таатай сонсогддоггүй. Танд үнэхээр цаг гаргаагүй бол үнэн учраа хэлж, дахин боломж олгохыг хүсэх хэрэгтэй. Түүнээс надад боломж алга гэж өөрийн хүч чадлыг дутуу ойлгуулах хэрэггүй. Танд бодсоноос тань илүү их хүч бий. Үүнийгээ харуул. Үүнийгээ харуулахад тань цаг хугацаа хүрэлцэхгүй бол цаг сунгахыг хүс. “Би үүнийг тун удахгүй дуусгах болно” гээд л хэлчих.
Амжилт хүсье.
