Уул уурхайн салбарын экспортод аудит явуулж байна

Үндэсний аудитын газраас улсын хэмжээнд “Экспортод гаргаж буй зарим нэрийн ашигт малтмалын олборлолт, борлуулалт, үнэ, ашиг, алдагдал” сэдэвт аудитын ажлыг эхлүүллээ. Монгол улсын хувьд 2017 онд 41.5 сая тонн, 2018 онд 45.8 сая тонн эрдэс бүтээгдэхүүн экспортолсон нь өмнөх оноос үнийн дүнгээр 24.6 хувиар өссөн үзүүлэлт болжээ.
Өнгөрөгч онд экспортлосон нийт эрдэс бүтээгдэхүүний 80 орчим хувийг нүүрс, 16 орчим хувийг төмрийн хүдэр баяжмал, гурван хувийг зэсийн хүдэр, баяжмал, үлдснийг нь бусад ашигт малтмалд оногдож байна.
Үндэсний аудитын газраас 2012 онд “Экспортод гаргаж буй зарим ашигт малтмалын талаар төрөөс баримталж буй бодлого, түүний хэрэгжилт, үр дүн” сэдвээр аудит хийж байсан. Аудитын үр дүнд уул уурхайн бүтээгдэхүүний экспортын үйл ажиллагаанд төрийн байгууллагуудын чиг үүрэг уялдаагүй, бодлого оновчгүй, үр өгөөж бага байна гэсэн дүгнэлт гарч байсан юм.