С.Зориг агсны амь насыг онц хэрцгийн байдлаар хөнөөсөн гэх хэрэгт буруутгагдаж, гурван ч шатны шүүхээс ялын дээд хэмжээ сонсоод буй Б.Содномдаржаа, Т.Чимгээ нар одоо гэм буруугүй болчихлоо. Тэгсэн ч тэдний суллах болоогүй л байна.
Уг нь тэд гэм буруутай. Гэхдээ хуулийнхан тэднийг эрүүдэн шүүж, яргалан тарчлааж байж гэм буруутайг тогтоосон гэх мэдээлэл цацагдах боллоо. Хэрвээ эрүү шүүлт тулгаагүй бол Б.Содномдаржаа, Т.Чимгээ нарыг ирээдүйд юу хүлээх байсан бэ.
Сэтгүүлч миний хувьд олон ч нийтлэлдээ бүх насаараа хоригдох ял сонссон, яахаас буцахгүй болчихсон Ц.Амгаланбаатарын үгээр бусдыг яллаж болохгүй гэж бичсэн. Гэвч хуулийнхан яг л миний хардаж байсанчлан Ц.Амгаланбаатарын үгээр яллаж орхив. Ингэхдээ бүх зүйлийг дараа нь ямар нэг асуудал үүсгэхгүй байх талаас нь бодолцож, эрүү шүүлтийн эрчимтэй ашигласан нь дүрс бичлэгт хадгалагдан үлджээ.
Одоо энэхүү бичлэг монгол хууль, хүчний байгууллага хүсвэл хэнийг ч, яаж ч буруутгаж, яллаж, тарчлааж чадна гэдгийг илчлэв.
Цөөн хүний асуудал биш. Энэ бол бүтэн аппаратын асуудал. Б.Содномдаржаа, Т.Чимгээ нарыг эрүүдэн шүүсэн хэрэгт ТЕГ-ын Мөрдөн байцаах газрын мөрдөгч, хурандаа Б, дэд хурандаа У болон ШШГЕГ-ын Тогтоол гүйцэтгэх албанд офицероор ажиллаж байгаад чөлөөлөгдсөн, Б.Хурцын хадам дүү Ү.Отгонбаяр, хорих ангийн төлөөлөгч, хэрэгт холбогдон ял шийтгүүлсэн дээрх хоёр хүнийг айлган сүрдүүлж буй бичлэгт байгаа хүмүүжигч Н.Итгэлтөгс нарыг шалгаж байна.
Гэвч эдгээр залуус дураараа, өөрийн хүслээр хүнийг эрүүдэж, Т.Амгаланбаатарыг хорих өрөө хэсүүлээгүй гэж бодогдож байна. Өөрөөр хэлбэл тэдэнд үүрэг даалгавар өгдөг хэн нэгэн, хэсэг бүлэг этгээд байсан л гэсэн үг. Харин эрүүдэн шүүж буй бичлэг ил болсоноор энэ асуудлыг шийдэх, цэгцлэх, ядаж л хуулийн байгууллагын этгээд дахин ийм зүйл хийвэл эрсдэлтэй юм байна гэх дохио өгсөн биз.
Хяналт шалгалт ч эрчимжиж Тагнуулын ерөнхий газрын нууц албаны бас нэг ажилтан энэ хэрэгт татагдаж, саатуулагдлаа. Цаашид Б.Хурцаас үүрэг даалгавар авчихсан тагнуулын олон залуу энэ хэрэгт татагдах байх. Харин энэ тухай үргэлжлүүлэн бичих үү, яах уу?
Ямартай ч хууль хүчнийхэн ямар бохир үйлдлийн гүйцэтгэгчид байдаг вэ гэдэг нууцыг ил гаргасан нөгөө “бичлэг”-т баярлаж явья. Цаашид ядаж, мөрдөн шалгагдаж буй этгээд “Намайг эд нар эрүүдэн шүүж болохгүй. Энэ бол хууль бус зүйл” гэдэг ерөнхий мэдээлэлтэй болно. Мөн эрүү шүүлт тулгадаг хуулийнхан хэзээ нэгэн цагт бүхнийг олон нийт мэддэг гэдэг ойлголтыг авсан байх гэж найдаж байна.
