Польш улсын нийслэл Варшав хотноо чөлөөт бөхийн “А” зэрэглэлийн эрэгтэйчүүдийн 28, эмэгтэйчүүдийн 23 дахь удаагийн олон улсын нээлттэй тэмцээн наймдугаар сарын 2-5-ны өдрүүдэд амжилттай явагдаж өндөрлөлөө.
Энэхүү тэмцээнд Монгол улсын чөлөөт бөхийн үндэсний шигшээ багийн тамирчид эрэгтэй, эмэгтэй тус бүр арван жинд хүч үзсэнээс есөн бөх медалийн төлөө барилдаж хоёр алт, нэг мөнгө, хоёр хүрэл медаль хүртсэн байна.
Эмэгтэйчүүдийн 68 кг-ын жинд барилдсан Хөдөлмөрийн баатар, Гавьяат тамирчин С.Батцэцэг, 65 кг-д барилдсан ОУХМ Х.Болортуяа нар тэмцээний алтан медаль хүртсэн байна.
С.Батцэцэг гавьяатын хувьд эзэн орны Агнешка Вейшчек, Украины Алина Бережна, ОХУ-ын Анастасья Братчикова, Канадын Даниэле Лаппагег нарыг ялж ийнхүү таван жилийн дараа Варшавын дэвжээнд хёр дахиа түрүүлсэн юм.
Харин ОУХМ Х.Болортуяа тус тэмцээнд анх удаа зодоглосон бөгөөд урамтай сайхан барилдаж Унгарын Ноеми Шабадос, Габриэла Шлейз, Испанийн Нереа Пампин, ОХУ-ын Наталья Федосеева, Украины Ирина Кольяденко нарыг ялж аваргалжээ.
Тэгвэл эрэгтэйчүүдийн 61 кг-ын жинд “Будапешт-2018” ДАШТ-ий хүрэл медальт ОУХМ Т.Түвшинтулга мөнгө, 74 кг-д ОУХМ Б.Бямбадорж, эмэгтэйчүүдийн 59 кг-д ОУХМ А.Батцэцэг хүрэл медалийн эзэн болсон юм. Энэхүү амжилтаараа манай эмэгтэй бөхчүүд Польшийн нээлттэй тэмцээнд багийн дүнгээр гуравдугаар байр эзэллээ.
