Цас орж, халтиргаа гулгаа үүссэн энэ үед гялгар хавтангаар хийсэн явган хүний зам шүүмжлэл дагуулж байна.

Тодруулбал, гялгар хавтан бүхий зам илүү их халтиргаа үүсгэдэг бөгөөд үүний улмаас хүн гэмтэж бэртэх эрсдэл өндөр байдаг юм.

Иймд явган хүний замын стандартын хэрэгжилтийн талаар холбогдох албаны хүмүүсээс тодрууллаа.

“Өмнө нь тавигдсан замуудыг нэг дор бүгдийг нь солих нь боломжгүй”

Гялгар чулуун хавтан бүхий явган хүний замын талаар Нийслэлийн Засаг даргын Хэвлэлийн төлөөлөгч Н.Сугар хэлэхдээ “Одоогийн Хотын удирдлагууд ийм гялгар хавтангаар огтхон ч зам тавиагүй. Өнөөдрийн үүсээд байгаа асуудал бол өмнө нь стандарт мөрдөөгүй, сэтгэл хөөрлөөр хийсний хор уршиг.

Уг асуудалд хотын удирдлага анхаарч, шинээр тавьж байгаа эсвэл шинэчилж байгаа явган замуудыг бүгдийг нь стандартад нийцсэн материалаар хийж буй.

Өөрөөр хэлбэл, халтирч гулгадаг, стандартад нийцээгүй замуудыг үе шаттайгаар шинэчилж байна. Бүгдийг нь нэг дор солих нь цаг хугацаа, эдийн засгийн хувьд боломжгүй. Хуулиараа ч шууд солих боломж байхгүй. Зарчмын хувьд, халтиргаа гулгаа үүсгэдэг тийм гялгар хавтангаар гаднахаа тохижуулсан хувийн байгууллагууд ч өөрчлөхийг шаардах нь ч зүйн хэрэг” гэв.

“Улаанбаатар хотод өвлийн улиралд хүн алхахад хүндрэлтэй 13 гудамж байна”

Түүнчлэн Нийслэлийн Засаг даргын Ахлах зөвлөх Д.Мөнх-Эрдэнээс тодруулахад“Хамгийн сүүлд явган хүний замын стандартыг энэ оны гуравдугаар сарын 24-нд шинэчилж, баталсан бөгөөд одоо уг стандарт хэрэгжиж эхлээд байгаа.

Энэ жил бид 80,000 ам.метр явган хүний замыг шинэчилсэн бол ирэх жил 100,000 метр явган хүний замыг шинэчилнэ. Энэ ажлууд бүгд шинэ стандартын дагуу хийгдэнэ. Өөрөөр хэлбэл, халтирч, гулгадаг, хүний эрүүл аюулгүй амьдрах эрхэд саад учруулдаг байдал дахиж давтагдахгүй гэсэн үг.

Мөн нэгэнт 10 орчим жилийн өмнө хийгдчихсэн замуудыг засвар шинэчлэлтийн хүрээнд өөрчлөх ажил үе шаттай явж байна.

Бидний хийсэн судалгаагаар Улаанбаатар хотод өвлийн улиралд хүн алхахад нэлээд хүндрэлтэй буюу халтиргаа гулгаатай 13 гудамж байна. Үүнийг стандартад нийцүүлэх ажлыг үе шаттай зохион байгуулна. Ингэхдээ харьцангуй богино хугацаанд, зардал багатай шийдэх орчин үеийн технологийн аргуудыг ашиглахаар туршиж байна.

Тухайлбал, чулуун хавтангийн гадаргууд зориулалтын наалт наах, гадаргууг нь шатааж барзайлгах техник ч байдаг. Бид энэ хэтээр янз бүрийн технологиудыг зэрэг туршиж, аль үр дүнтэйг нь хэрэгжүүлнэ” хэмээн тайлбарлалаа.

Ташрамд дурдахад, өнгөрсөн хоёр хоногт халтирч унаад, бэртэж гэмтсэн 233 иргэн ГССҮТ-өөс тусламж, үйлчилгээ авсан байна.