Цагдаагийн байгууллагаас улсын дугаар тодорхойгүй, зөвшөөрөлгүй хувийн такси үйлчилгээгээр үйлчлүүлэхгүй байхыг иргэдэд анхааруулаад байгаа юм. Түүнчлэн хойд дугаараа авсан тээврийн хэрэгслүүд шөнө оройн цагаар их явах болсон талаар иргэд мэдээлж буй.
Энэ талаар Тээврийн цагдаагийн албаны Урьдчилан сэргийлэх хэлтсийн ахлах зохицуулагч цагдаагийн ахмад Д.Ганхуягаас тодрууллаа.
– Хойд дугаараа авсан тээврийн хэрэгслийг хэрхэн илрүүлж байна вэ?
– Хойд дугаараа авсан тээврийн хэрэгслийг харсан уулзвар дээр зогсож буй цагдаагийн алба хаагч дараагийн уулзвар руугаа “хойд дугааргүй машин явж байна шүү” гэдгийг мэдээлдэг. Мөн замын хөдөлгөөний удирдлагын төвийн камераар илрүүлж явж байсан уулзвар дээр нь зогсоож байна гэх мэтчилэн энэ асуудал дээр маш их ач холбогдол өгч ажиллаж байгаа.
Суусан таксиныхаа дугаарыг ойр дотны хүмүүстээ мэдээлэх нь гэмт хэргээс сэргийлэхээс гадна юмаа мартвал эргэж олж авахад хялбар болно.
– Улсын дугаараа авч хөдөлгөөнд оролцож буй үйлдлийг гэмт хэргийн шинжтэй гэж үзэж болох уу?
– Энэ бол зөрчил. Ийм зөрчил гаргасан жолооч “дугаараа хулгайд алдсан, усанд гээсэн, мөргөлдөөд ашиглах боломжгүй болсон учраас хэвлүүлж авах гээд л явж байна” гэх мэт янз бүрийн л шалтгаан хэлдэг.
Гэхдээ гэмт хэргийн сэдэлтэйгээр улсын бүртгэлийн дугаараа авсан байхыг үгүйсгэхгүй. Иймд иргэдэд улсын бүртгэлийн дугааргүй хувиараа такси эрхэлж байгаа тээврийн хэрэгсэлд суухгүй байхыг зөвлөж байна.
Түүнчлэн таксинд суухдаа заавал ойр дотныхоо хүн рүүгээ ямар улсын бүртгэлийн дугаартай тээврийн хэрэгсэлд суусан талаараа хэлж, мессеж бичих хэрэгтэй. Энэ нь ганц гэмт хэргээс сэргийлээд зогсохгүй тухайн таксинд юмаа мартсан тохиолдолд эргэж олж авахад хялбар болно.
– Улсын дугааргүй явж байгаад гэмт хэрэг үйлдсэн тохиолдол бүртгэгдсэн үү?
– Гэмт хэргээс илүү улсын дугааргүй явж байгаад зам тээврийн осол гаргаад зугтаасан тохиолдол бол маш олон бүртгэгдсэн.
Энэ оны эхний есөн сарын байдлаар улсын бүртгэлийн дугаартай холбоотой нийтдээ 173,000 зөрчил бүртгэгджээ
/Хуурамч улсын дугаартай зорчсон зөрчил нь тэгш, сондгойгоор зорчих зохицуулалтын үед ихээр илэрдэг аж./
A Flourish data visualizationУлсын бүртгэлийн дугаарын зөрчилтэй зорчсон үйлдлийг зөрчил гэж үзэж Зөрчлийн тухай хуулийн 14.7-р зүйлээр хариуцлага тооцдог юм байна.
11.1.арилсан; 11.2.бүдгэрч үзэгдэх байдал нь муудсан; 11.3.танигдахгүй бохирдсон, эсхүл дугаарыг буруу байрлуулсан бол хүнийг 10,000 төгрөгөөр, хуулийн этгээдийг 100,000 төгрөгөөр торгоно.
12. Улсын бүртгэлийн дугааргүй, эсхүл дугаараа нуун далдалсан тээврийн хэрэгслээр замын хөдөлгөөнд оролцсон бол хүнийг 25,000 төгрөгөөр, хуулийн этгээдийг 250,000 төгрөгөөр торгоно.
13. Хуурамч улсын бүртгэлийн дугаартай буюу өөр тээврийн хэрэгслийн дугаар ашигласан бол гурван сарын хугацаагаар жолоодох эрхийг хасаж хүнийг 50,000 мянган төгрөгөөр, хуулийн этгээдийг 500,000 төгрөгөөр торгодог юм байна.
