ОХУ-ын Ерөнхийлөгч Владимир Путин Украины эсрэг дайнд оролцсон гадаад иргэдэд Оросын иргэншил олгох зарлигт гарын үсэг зурсан байна.
Тус зарлигт ОХУ-ын нэрлэж буй “цэргийн тусгай ажиллагаанд” нэгдсэн гадаадын иргэд өөртөө болон гэр бүлийн гишүүддээ Оросын иргэншил хүсэх боломжтой гэж заажээ.
Үүний тулд дор хаяж нэг жилийн хугацаанд дээрх гэрээнд нэгдсэн байх шаардлагатай аж.
Уг шийдвэрийг цэргийн туршлагатай гадаад иргэдийг нэмэлт урамшуулал олгох замаар Оросын армид элсүүлэх зорилготой хэмээн шинжээчид үзэж байна.
ОХУ-аас гадаадын хэдэн хүн Оросын талд тулалдаж байгаа талаар тоон мэдээлэл гаргаагүй. Гэхдээ Ройтерс агентлаг Куба болон Африкийн иргэд өөрсдийн дундаж цалингаас 100 дахин илүү үнээр Оросын армид элссэн хэмээн өмнө нь мэдээлж байсан.
АНУ-ын тагнуулын тайланд дурдсанаар Орос-Украины дайн эхэлснээс хойш ОХУ-ын 315 мянга гаруй цэрэг амиа алдсан гэжээ. ОХУ 2022 оны есдүгээр сард армидаа 300 мянган хүн нэмж элсүүлж байв.
Эх сурвалж: Reuters
