Xaр тамхи, мансууруулах бодисын хэрэглээ, хууль бус наймаа Монгол Улсад аюулын харанга дэлдсээр байна. Цагдаагийн байгууллагад бүртгэгдэж байгаа энэ төрлийн гэмт хэрэгт холбогдсон хүмүүсийн тоо жилээр бус сараар өсөж байгаа нь хар тамхины аюул ямар төвшинд хүрснийг бэлхнээ харуулж байна. Жишээлбэл, Одоогоос 6 жилийн өмнө 30 гаруй насны 2 эмэгтэй Малайзад амралтаа өнгөрүүлээд нутаг буцахаар Бээжингийн олон улсын нисэх буудлыг чиглээд явж байжээ. Гэтэл нэг найз нь таньдаг хүнээсээ юм авах ёстой гэж хэлээд замаараа нэг газраар хальт ороод гарчээ. Гарч ирэхдээ хөнжлийн даавуунууд барьсаар гарч ирсэн байна. Хөнжлийн даавуунууд нь цүнхэнд нь багтахгүй байсан учир нөгөө найзыгаа цүнхэнд хийгээд явахыг гуйсан байна. Гуйлт нь тийм ч хэцүү санагдаагүй учир биелүүлжээ. Гэтэл Бээжингийн онгоцны буудлын шалган нэвтрүүлэх цэгт очиход өнөөх хөнжлийн даавуун дундаас нь хар тамхины төрлийн бодисуудыг хууль хяналтын байгууллагынхан илрүүлсэн байна. Ингээд л 2 бүсгүй бүх насаараа хоригдох ял сонссон. Мөн Өмнөговь аймгийн гашуунсухайтын хилийн боомт руу нүүсний тээвэрт явдаг нэгэн жолооч уурхайгаас нүүрсээ ачин хилийн зүг жолоо залжээ. Замд гарахаас нь өмнө нэг танил хүн нь Хятадад очоод багахан хэмжээтэй ачаа аваад ирэхийг гуйжээ. Хар буруу юм санаагүй тул нөгөө жолооч Хятадад очин нүүрсээ буулгачхаад ачааг нь аваад машины бүхээгтээ хийчихсэн байна. Гэтэл ганц модны хилийн шалган нэвтрүүлэх албаны ажилтнууд машин дотроос нь 9 кг гаруй мансууруулах төрлийн Мими гэдэг бодисыг илрүүлжээ. Энэ хүн одоо БНХАУ-ын шоронд ял эдэлж байна.
Ямар нэг байдлаар ачаа дайх, эсвэл хэн нэгний ачааг хүргэж өгөх гэж авах нь маш аюултай гэдгийг санах хэрэгтэй
Таны бие, эсвэл ачаанаас чинь хар тамхи илэрсэн л бол түүнийг та санаатайгаар хил давуулах гэж оролдсон уу, эсвэл хэн нэгний ачааг хар буруу саналгүйгээр авсан уу гэдгийг тогтоох нотолгоо олдохгүй. Нөгөө талаар хэн нэгэнд та ачаа дайж явууллаа гэхэд нөгөө хүн хил дээр хар тамхи тээвэрлэх гэж оролдоод баригдвал таныг сэжиглэн шалгах бүрэн үндэслэл болно. Хар тамхины хэрэгт холбогдсон ихэнх иргэн хэргээ хүлээн зөвшөөрөхгүй санаатай ийм үйлдэл гаргаагүй, мэдээгүй гэж хэлдэг. Тэгэхээр ямар нэг байдлаар ачаа дайх, эсвэл хэн нэгний ачааг хүргэж өгөх гэж авах нь маш аюултай гэдгийг санах хэрэгтэй. Хар тамхи нь хүний бие эрүүл мэнд, сэтгэхүйд ноцтой хохирол учруулахаас гадна гадны зарим улсад хар тамхи хэрэглэсэн, санаатай болон санаандгүйгээр тээвэрлэсэн тохиолдолд маш хүнд шийтгэлтэй байдаг. Үүнийг иргэд мэдээгүйгээс, эсвэл мэдсэн ч хил гаалийн шалгалтыг хуурчихна гэсэн андуурдгаас болж харь оронд ялтан болсоор байна. Хил гаалийн хяналтын багаж, технологи арга хэрэгсэл тасралтгүй хөгжиж сайжирч байгаа. Тиймээс иргэд хил гаалийг хуураад, хар тамхи гэгч аюулт тахлыг эх орондоо тээвэрлэн, ирээд амар хялбараар мөнгө олчихно гэж андуурах хэрэггүй. Мөн хүнд тус болох гэж дайвар ачаа аваад эх орондоо хэзээ ч ирж чадахааргүй харийн шоронд бүх насаа өнгөрүүлэх бий.Үүнийг сайн анхаарч явахыг сануулж байна.
Энэ он гарсаар тусгай ажиллагаагаар хар тамхины 24 хэргийг илрүүлжээ
Энэ он гарсаар тусгай ажиллагаагаар хар тамхины 24 хэргийг илрүүлжээ. Үнэрч нохой тээврийн хэрэгсэлд нуусан мансууруулах бодисыг төвөггүй олж чадна. Манай улсад 5 үүлдрийн үнэрч нохой хар тамхи илрүүлж байна.Нохойн үнэрлэх чадвар хүнийхээс 7 мянга дахин илүү тул зарим нарийн багаж төхөөрөмжийг орлож чаддаг байна. Улсын хилээр орж ирж байгаа иргэдийн гараас дээж авч шалгаж байна. Англи улсад үйлдвэрлэсэн энэ төхөөрөмж хар тамхи илрүүлэх өндөр чадалтай. Хэрэв тухайн хүн 48 цагийн дотор хар тамхитай харьцсан бол шууд илрэх юм. Мөн сэжигтэй ачаа тээшийг рентген аппарат ашиглан дахин шалгах ёстой. Хар тамхи тээвэрлэсэн эсэхийг мөн дэвшилтэт технологи болох уян камераар шалгаж байна.
Ихэвчлэн 20-30 насны залуус энэ төрлийн гэмт хэрэгт холбогдож байна
Сүүлийн үед манай улсын иргэд хар тамхи, мансууруулах бодис хил давуулан тээвэрлэх гэж байгаад баригдах явдал ихээр гарч байна. Ихэвчлэн 20-30 насны залуус энэ төрлийн гэмт хэрэгт холбогдож, бүх насаараа хорих ял, зарим нь бүр цаазын ял авч байгаа нь сэтгэл түгшээсэн асуудал болж байгаа билээ. Өнгөрсөн 2017 онд хар тамхитай холбоотой 117 хэрэгт 275 хүн холбогдож, 51 хүн гадаадад саатуулагдсан байна. Хил давуулан хар тамхи зөөвөрлөх үйлдэлдээ гэмт хэрэгтнүүд хэн нэгнийг санаатайгаар уруу татдаг, золиос болдог. Захиалагч талын санал болгосон мөнгөнд шунахдаа ээж аав, элгэн саднаа хүртэл хар тамхи тээвэрлэгч болгож байсан тохиолдол байна. Иймээс Хил гааль, цагдаа тагнуулын байгууллагын мөрдлөг, хяналт хэзээ ч сулардаггүй учраас энэ төрлийн гэмт хэрэгт аз тохиодоггүй гэдгийг хэлмээр байна.
