Шанхайн хамтын ажиллагааны байгууллагад элсэх нь зөв, буруу гэсэн талцал сүүлийн өдрүүдэд нэлээд өрнөх болсон. Үүнтэй холбоотойгоор Хөдөлмөрийн Үндэсний Намаас мэдээлэл хийж, байр сууриа илэрхийлэн уриалга гаргаж байгаагаа өнөөдөр уламжиллаа.
Тус намаас гаргаж буй “Ард нийтийн санал асуулга явуулах тухай уриалга”-ыг энд бүрэн эхээр нь хүргэе.
Ард нийтийн санал асуулга явуулах тухай уриалга
Эх орныхоо хөгжил дэвшлийн төлөө эвлэлдэн нэгдсэн бид Монгол Улсын ирээдүйн хөгжил, үндэсний эрх ашиг, тусгаар тогтнол, эв нэгдлийг эрхэмлэн төр засаг, нам, улс төрийн хүчнүүд, нийт монголчууддаа хандан уриалга гаргаж байна.
Монгол Улс олон улс, бүс нутгийн хамтын ажиллагааны байгууллагад, тэр тусмаа ШХАБ-д нэгдэх үүрэг хүлээж, бусад улсуудтай хамтран ажиллах нь нээлттэй билээ. Гэсэн хэдий ч ШХАБ-д элсэх эсэх тухай асуудал иргэдийн анхаарлыг татаж, буруу зөрүү мэдээлэл тархаж, төөрөгдүүлж, нийгэмд талцал үүсгэж байгаа тул Монгол Улсын Ерөнхийлөгч, УИХ, Засгийн газар энэхүү чухал асуудлыг онцгойлон анхаарч, олон талаас нь харгалзан тулхтай шийдвэр гаргах ёстой гэж бид үзэж байна.
Иймээс ШХАБ-д элсэхтэй холбоотой асуудлыг нэмж судлах, Монгол төрийн зүгээс иргэддээ ШХАБ-д элссэнээр Монгол Улсын бие даасан гадаад бодлого, олон улс дахь нэр хүндэд ямар давуу тал үүсэх, ямар сөрөг тал бий болох, эдийн засаг, хөрөнгө оруулалтын ямар нөхцөл боломж, давуу тал үүсэх, элсэхгүй бол ямар давуу тал боломж хаагдах гэж байгаа талаар тодорхой мэдээлэл өгч, ойлголтын зөрүүг маргаангүй шийдвэрлэхэд анхаарах шаардлагатай байна.
ХҮНамаас ШХАБ-ын зорилго, сайн мууг шинжлэн дүгнэх, асуудлын шийдлийг чиглүүлэх, эсвэл Монгол Улсын гадаад бодлогыг шүүн хэлэлцэх ямар ч зорилгогүй. Гагцхүү энэхүү шийдвэр Монгол Улсын ирээдүйг олон жилээр тодорхойлж явах нөлөөтэй, түүхэн чухал шийдвэр тул Монгол Улсын өнөөгийн төр засаг судалгаа, итгэл үнэмшил муутайгаар богино хугацаанд яаран энэ шийдвэрийг гаргах ёсгүй гэж үзэж байна. Учир нь:
- Энэ шийдвэр аль нэгэн байгууллагад гишүүн болох төдий асуудал огт биш. Монгол Улсын цаашдын олон жилийн хөгжлийн бодлого, арга замд шууд нөлөөлөх чухал асуудал.
- Монголчуудын зуу зуун жилээр хүсч тэмүүлж, амиа зориулж тэмцэж байсан тусгаар, бие даасан байдалд ямар нэг байдлаар тусгалаа олох, цаашид нөлөөлж болох асуудал.
- Ийм чухал асуудлыг одоо засаг барьж байгаа эрх баригчид, цөөхөн улс төрчид иргэдээсээ мэдээлэл нууж байгаад хаалттай хуралдаанаар шийдвэр гаргах нь цаашид монголчуудын дунд үл итгэлцэл, хардалт, хагарал үүсгэж, олон жил үргэлжилж мэдэх хорт үр дагавартай харш үйлдэл болно.
- Улс орны ирээдүйн олон арван жилийг тодорхойлох ийм чухал асуудлыг өнөөгийн дөрвөн жилийн хугацаатай сонгогдсон, дээр нь ард олны дунд нэр хүнд нь шалдаа буусан, намууд, улс төрчдөөр шийдүүлэх, тэдэнд итгэл үзүүлэх нь үнэхээр байж боломгүй зүйл.
Иймээс дээр дурьдсан нөхцөл байдал, хүчин зүйлсийг үндэслэн улс орны хойч ирээдүй, үндэсний эрх ашиг, эв нэгдлийг эрхэмлэн үзэж, Монгол Улсын Үндсэн хуулийн 25 дугаар зүйлийн 16-д зааснаар, ШХАБ-д элсэх эсэх тухай асуудлаар ард нийтийн санал асуулга явуулж эцэслэн шийдвэрлэхийг Монгол Улсын Ерөнхийлөгч, Монгол Улсын Их Хурал, Монгол Улсын Засгийн газарт хандан уриалж байна. Энэхүү уриалгыг дэмжиж, энэ асуудалд анхаарлаа хандуулж, Монголчууд нэгэн тал болж, эх орныхоо ирээдүйн хөгжил, сайн сайхны төлөө идэвхтэй хамтран ажиллахыг нам, бүх улс төрийн хүчнүүд, эх нутаг болон гадаад оршин суугаа нийт монголчуудаа уриалан дуудаж байна.
Ийнхүү уриалгаа танилцуулсаны дараа зарим тайлбарыг өглөө. Тухайлбал, ШХАБ-ын хөтөлбөр тодорхойгүй байгаагийн учир нь бодлого тодорхойлдог хоёр хөршийн нэг нь цэрэг, улс төрийн асуудлаар илүү хамтаръя гэдэг бол өмнөд хөршөөс эдийн засгийн асуудал дээр илүү оролцоотой байя гэсэн зарчмын зөрүүтэй санал байгаа аж. Эдийн засгийн коридорын асуудал бол Монгол Улсын хувьд чухал. Тэгэхээр нэгэнт энэ байгууллага эдийн засгийн асуудлыг цаашаа тавиад явна гэдэг эргэлзээтэй байгаа ч тийм боломж нь байгаа гэх юм бол ХҮНамын зүгээс судалж үзэн, мэдээлэлтэй байхыг хүсч буйгаа энэ үеэр илэрхийлж байлаа. Улмаар тэрхүү боломжид эдийн засгийн дүгнэлтээ өгч, үнэхээр энэ бол зөв зүйтэй юм гэвэл иргэддээ мэдээллийг нээлттэйгээр өгье хэмээн байр сууриа илэрхийлсэн юм.
