АТГ-аас цаг үеийн асуудлаар мэдээлэл хийлээ. Энэ үеэр олны анхаарлыг татсан дуулиант хэргүүдийн шалгалтын үйл ажиллагаа хэрхэн явагдаж буй талаар АТГ-ын Мөрдөн шалгах хэлтсийн дарга Э.Идэрцогоос тодрууллаа.
-Өнгөрсөн шөнө “Эрдэнэт” үйлдвэрийн дарга асан Ч.Ганзоригийг саатуулсан. Энэ хэргийн талаар дэлгэрэнгүй мэдээлэл өгнө үү?
-“Жаст” группийн захирал асан Ш.Батхүү “Эрдэнэт” үйлдвэрээр баталгаа гаргуулан Өмнөд Африкийн Стандарт банкнаас их хэмжээний зээл авсан байдаг. Энэ хэрэгт холбогдуулан тухайн үеийн “Эрдэнэт” үйлдвэрийн удирдлагаар ажиллаж байсан захирал асан Ч.Ганзоригийг яллагдагчаар татсан байсан. Үүнтэй холбоотойгоор Ч.Ганзоригийг саатуулан шалгаж байна. Прокуророос Ч.Ганзоригийг цагдан хорих санал тавьсан. Одоо шүүхээр шийдүүлэх үйл ажиллагаа явагдана. Энэ хэрэгт холбогдуулан таван хүнийг шалгаж байна. Тодруулбал, “Жаст” группийн захирал асан Ш.Батхүү, “Эрдэнэт” үйлдвэрийн захирал асан Ч.Ганзориг, н.Мөнхжаргал, Амарбат, Галбадрах нарын таван хүнийг шалгаж байна.
-Ч.Ганзоригийг Ш.Батхүүтэй хамт шалгаж болох байсан. Хожуу шалгаж буй шалтгаан нь юу вэ?
-Уг хэргийг удаан хугацаанд шалгаж буй нь үнэн. Гаднын банкнаас орж ирсэн мөнгө “Жаст” компани болон түүний хамаарал бүхий компаниудын үйл ажиллагаанд ашиглагдсан нь тогтоогдсон. Тийм учраас тус компаниудад шалгалт хийж байна. Тус компанийн салбарууд бүх аймаг, сумдад бий. Тэр бүрд шалгалт явуулах ажиллагаа явагдаж дуусаагүй байна. Уг хэргийн шалгалт дуусвал бид тус хэргийг прокурор руу шилжүүлнэ.
-Ерөнхий сайд асан С.Баяр, Ч.Сайханбилэг нарыг “Оюутолгойн” гэрээтэй холбоотойгоор цагдан хорьж шалгаж байгаад сулласан. Одоо хэрэг ямар шатандаа шалгагдаж байна вэ?
-Олон улсын гэрээтэй холбогдолтой хэрэг учраас хуулийн дагуу аль болохоор шуурхай шийдвэрлэхээр ажиллаж байна. Уг хэрэг дээр нэлээн олон шинжилгээ хийгдэж байна. Бид нараас шалтгаалахгүйгээр шинжилгээний багийнхан шалгаж, танилцах материал маш их бий. Шинжилгээний дүгнэлт гарсны дараа уг хэргийг прокурорт шилжүүлнэ. Үүний дараа прокуророос шүүх рүү шилжүүлнэ. Шүүхээр гэм буруутай эсэх тогтоогдоно. Одоогоор шинжээч нарын дүгнэлт гараагүй байна.
-Хууль зүйн сайд Ц.Нямдоржийг иргэний гомдлын дагуу авлигал авсан эсэхийг шалгаж байгаа гэсэн. Уг хэрэг шалгагдаж дууссан уу?
-Монгол хүний төлөө намын дарга Х.Бат-Ялалтаас Хууль зүйн сайд Ц.Нямдоржийн 17 хөрөнгөтэй холбоотой асуудлыг шалгуулахаар хандсан. Үүнд дээр хэрэг бүртгэлт нээж шалгах ажиллагааг явуулсан. Дээр дурдагдсан бүх хөрөнгийг нэг бүрчлэн шалгасан. Энэ асуудалд ямар нэгэн байдлаар үндэслэлгүй хөрөнгөжсөн, авлига албан тушаалаа урвуулан ашигласан нөхцөл байдал тогтоогдоогүй гэж үзэж хэргийг хаах саналтайгаар прокурорын байгууллагад шилжүүлсэн. Прокурор зарим нэг зүйлийг тодруулна. Одоогоор шалгалтын ажиллагаа үргэлжилж байна.
-ОБЕГ-ын дарга Т.Бадралыг төсвийн хөрөнгөөр 21 ширхэг тээврийн хэрэгслийг 2.1 тэрбум төгрөгөөр худалдан авахад нөлөөлсөн гэгдэх хэрэг аль шатандаа явж байна вэ?
-Уг хэргийг мөрдөн шалгах ажиллагаа явагдаж байна.
-Өнгөрсөн сараас эхлээд цагдаагийн дарга нарыг цагдан хорьж байгаа гэсэн асуудал яригдах боллоо. Энэ хэргийн талаар мэдээлэл өгнө үү?
-Цагдаагийн алба хаагчидтай холбоотой хэргийн тухайд цагдаагийн байгууллага ШШҮХ-ийн шинжээч нар худал дүгнэлт санаатай гаргасан гэсэн асуудлаар холбогдон шалгагдаж байсан шинжээч нарыг авлига хээл хахуулийн шинж чанартай асуудал тогтоогдож байгаа тул хамтарсан ажлын хэсэг байгуулагдсан. Улмаар ШШҮХ-ийн зохих шинжээч нарыг авлигын хэрэгт холбогдуулан яллагдагчаар татаж шалгаж байгаа.
-60 тэрбумын хэрэг юу болж байгаа вэ?
-Прокуророос хэргийг хаасан. Ажлын хэсэгт орсон ТЕГ-ын үндэслэл бүхий баримтыг сэргээн шалгах шаардлагатай байна гэсэн хүсэлтийг дагуу дээд шатны прокурор хэргийг сэргээсэн. Ингээд гурван байгууллагын хүрээнд мөрдөн шалгах ажиллагаа явуулах чиг үүргийг даалгасан. Хэрэг асуудлыг сэргээх, мөрдөн шалгах ажиллагааг явуулах нь прокурорын эрхийн асуудал. Одоогоор тагнуулын байгууллага дээр голлон төвлөрч, шалгалтын ажиллагаа явагдаж байна. Мөн прокурорын хяналтад шалгагдаад явж байгаа юм.
