Ардчилсан хөдөлгөөний удирдагч, төр нийгмийн нэрт зүтгэлтэн Санжаасүрэнгийн Зориг агсны хөшөөнд цэцэг өргөх өргөх ёслол өнөөдөр боллоо. Тэрээр 1998 оны аравдугаар сарын 2-ны өдөр гэртээ бусдын гарт амь насаа алдсанаас хойш 20 жил өнгрөөд байна. Тэрхүү харамсалт үйл явдлаас хойш жил бүрийн энэ өдөр түүний гэр бүлийнхэн, АН-ынхан, журмын нөхөд, ардчилсан хувьсгалын зүтгэлтнүүд болон үйл хэргийг нь мэддэг, хүндэтгэдэг ард түмэн хөшөөнд цэцэг өргөж, дурсгалыг нь хүндэтгэдэг уламжлалтай.
36 насандаа бусдын гарт хэрцгийгээр амиа алдсан хэргийг илрүүлсэн хэмээн Ц.Амгаланбаатар, Б.Содномдаржаа, Т.Чимгээ нарт 18-23 жилийн ял оноосныг олон нийт эргэлзэж хүлээж авсан. Хэрэг үйлдсэн гэж ял авсан хүмүүсийн цаана хамгийн гол учир зангилаа болох улс төрийн захиалгат энэ хэргийн захиалагчийг олох ёстой хэмээн хууль хяналтынхныг шүүмжилдэг.
Захиалагчийг нуух зорилгоор хуурамч хүмүүсийг гаргаж ирж, төөрөгдлийг бий болгосон
УИХ-ын гишүүн Б.Пүрэвдорж: Нийгэмд маш олон хардлага бий. Тэрхүү хардлагыг эцэс болгох үүрэг хуулийн байгууллагын өмнө бий. Тийм учраас ажлаа хурдан шуурхай хийх хэрэгтэй байна. Энэ хэргийг улс төрийн захиалгатай байсан гэдэгт итгэдэг. Хэргийн хамгийн шол хохирогч нь манай Ардчилсан нам өөрөө юм. Тус намын жирийн гишүүний хувьд энэ хэргийн захиалагч илрээсэй, үнэн мөн нь тогтоогдоосой гэж боддог.
Холбогдох байгууллагууд шалгасны эцэст үнэн мөнийг ард түмэн зарлах ёстой гэж бодож байна
УИХ-ын гишүүн, Ардчилсан намын дарга С.Эрдэнэ: Эрх мэдэл, албан тушаалтнууд одоо болтол дуугарахгүй байгаа. Энэ нь өөрөө эргэлзээг улам бүр нэмэгдүүлж байна. Хэргийн захиалагч илрээгүй, ямар зорилго, зохион байгуулалттайгаар үйлдсэн болох нь тогтоогдоогүй цагт хэргийг илэрсэн гэж үзэх боломжгүй. Холбогдох байгууллагууд шалгасны эцэст үнэн мөнийг ард түмэн зарлах ёстой гэж бодож байна.
Бид олон улсын парламентын байгууллага, гүйцэтгэх зөвлөл, хууль хяналтын байгууллагуудад жил бүр шаардлага хүргүүлдэг. Гэвч шалгаж байна гэх шалтгаанаар тодорхой хариулт ирүүлдэггүй. Энэ хэргийг шалгаж дуусаагүй гэх хатуу байр суурьтай байна. Захиалагчийн илрүүлэх ёстой.
УИХ-ын гишүүн Ж.Батзандан: С.Зориг агсны амийг улс төрийн захиалгатайгаар хөнөөсөн гэж үзэж байна. Өнөөдрийг хүртэл захиалагч болон амь насыг хөнөөсөн этгээдүүдийг эрж хайж байгаа. Хөнөөсөн гэх нэрийдлээр гурван иргэнийг хорьсон. Би үүнд итгэхгүй байгаа. 1998 онд арван хэд, хорин хэдэн настай залуучууд хөнөөсөн гэдэгт итгэхгүй байна. Жинхэнэ захиалагчийг нуух зорилгоор хуурамч хүмүүсийг гаргаж ирж, төөрөгдлийг бий болгосон.
