Он гарсаар Онцгой байдлын албаны албан хаагчид объектын гал түймрийн 3040 удаагийн дуудлагаар 791 хүний амь нас, төр, аж ахуйн нэгж, байгууллагын 34.5 тэрбум төгрөгийн өмч хөрөнгийг авран хамгааллаа.
Объектод гарсан гал түймрийг өнгөрсөн оны мөн үетэй харьцуулахад гал түймрийн тоо 3.15 хувиар буурч, учирсан хохирлын хэмжээ 40.9 хувиар өссөн байна.
Түүнчлэн гал түймрийн улмаас 58 хүн амь насаа алдсны 31 том хүн, 27 хүүхэд байгаа юм. Гарч байгаа гал түймрийн дийлэнх нь шөнө орой болон өглөөгүүр гардаг байна.
Иймд иргэд, аж ахуйн нэгжид өөрийн болон бусдын амь нас, эрүүл мэнд, эд хөрөнгөд учирч болзошгүй эрсдэлээс урьдчилан сэргийлж, цахилгааны аюулгүй байдлаа хангах, халаалтын төхөөрөмжийн галын аюулгүй байдлыг хангаж, бага насны хүүхэд, өндөр настан болон хөгжлийн бэрхшээлтэй иргэдийг харгалзах хүнгүйгээр гэртээ орхихгүй байх, цогтой үнс нурмаа ил задгай газар асгахгүй байх, бага насны хүүхдийг шүдэнз, асаагуур зэргээр тоглуулахгүй байхыг санууллаа.
Түүнчлэн гэр орондоо зул, хүж, лаа, дэн асаахдаа галын аюулгүй байдлыг хангаж, хяналтгүй орхихгүй байх, шингэрүүлсэн шатдаг хийгээр ажилладаг тулга, зуухыг ашиглахдаа аюулгүй ажиллагааны дүрэм журмыг баримтлах, эвдрэл гэмтэлтэй зориулалтын бус цахилгаан хэрэгслийг ашиглахгүй байх, автомашинаа дулаан болон ил зогсоолд байрлуулахдаа галын аюулгүйн зай хэмжээг баримталж, гал түймрийн аюулаас урьдчилан сэргийлэхийг мөн анхааруулж байна.
