Өнгөрөгч 2016 оны сонгуулийн стартеги, санхүүжилт, төрийн албыг шатлалаар нь үнэлэн зарах схемийг өдгөөгийн УИХ-ын дарга М.Энхболд, Нийслэлийн МАН-ын дарга асан Ц.Сандуй, А.Ганбаатар нарын нөхөд төлөвлөн зурсан.
Харин 2017 оны Ерөнхийлөгчийн сонгуулийн өмнөхөн эрх мэдэлтнүүдийн төрийн албыг үнэлэн зарах тус яриа бодит бичлэгээр нийтийн сүлжээнд ил болсон юм. Тиймээс бичлэгийг Нийслэлийн проукрорын газраас шалгаад “яриа болсон нь бодит зүйл, энэ бол эвлүүлэг биш” гэж үзсэн ч “Төрийн эрхийг хууль бусаар хүч хэрэглэн авсан, сонгуулийн үр дүнд хууль бусаар нөлөөлсөн гэх нөхцөл байдал тогтоогдоогүй” гэх дүгнэлт гаргасан байдаг. Нөгөө талаас “60 тэрбум”-ын гэх хэргийг АТГ-аас шалгаад нэг мөр хаасан ч шударга гишүүдийн эсэргүүцэл, нийтийн шаардлагаар дахин сэргээн шалгасан.
Өнөөдөр яг энэ улс төрийн үймээн, нийгмийн анхаарал дунд Нийслэлийн Ерөнхий проукрор, Хууль цаазын тэргүүн зөвлөх Д.Баярмагнай “60 тэрбумын асуудал бол эвлүүлэг биш, бодит яриа” гэсэн утга бүхий тайлбар өгсөн нь хэргийг нэг мөр дарах гэсэн оролдлого удаа дараа хийж буй АТГ-ыг хүнд байдалд орууллаа.
Уг нь 2018 оны наймдугаар сард “нөхцөл байдал тогтоогдоогүй” хэмээн хаасан “60 тэрбум”-ын хэргийг Тагнуулын газраас “энэ асуудлын хүрээнд шалгах мэдээ мэдээлэл байна” гэсэн санал тавьсан аж. Тиймээс Нийслэлийн Ерөнхий проукрор мөрдөх байгууллагын саналыг хянаад “хэргийг сэргээн шалгавал зохих асуудлууд байна” хэмээн үзэж, хэрэг бүртгэх хэргийг хаасан прокурорын шийдвэрийг хүчингүй болгосон гэдгээ мэдэгдлээ. Хууль хяналтын байгууллагын зарим дүгнэлт, хэрэг мөрдөх шалгах явцад өгч буй албаны хүний тайлбараас харахад “60 тэрбум”-ын хэрэг бодит зүйл болж байна.
Хамгийн гол нь төрийн өндөр дээд албан тушаалтнуудын авлигын шинжтэй үйлдэл, хууль бус зүйлтэй тэмцэх зорилго бүхий байгуулагдаж байсан АТГ “60 тэрбум”-ын хэрэг нь эвлүүлэг хэмээн үзсэндээ нүүр хийх газаргүй болж байна.
www.zindaa.mn
