Гадаад харилцааны яамны Төрийн нарийн бичгийн дарга Д.Даваасүрэн өчигдөр /2019.5.27/ Монгол улсад суух болон хавсран суух Элчин сайд нарыг хүлээн ав уулзлаа.
Шинэ Зеланд улсын Элчин сайд Патрисиа Фернлейг хүлээн авч уулзлаа
Шинэ Зеланд Улсаас Монгол Улсад хавсран суух Элчин сайдаар томилогдсон хатагтай Патрисиа Фернлейг хүлээн авч уулзав. Уулзалтаар талууд Монгол, Шинэ Зеландын харилцааны өнөөгийн байдал болон цаашид хэрэгжүүлэхээр төлөвлөж буй айлчлал, арга хэмжээний талаар дэлгэрэнгүй санал солилцов.Төрийн нарийн бичгийн дарга Д.Даваасүрэн Шинэ Зеланд Улстай харилцаа, хамтын ажиллагаагаа хөгжүүлэх нь Монгол Улсаас Ази, Номхон далайн бүс нутагт явуулж буй гадаад бодлогод чухал байр суурь эзэлж байгааг нотлоод хамтын ажиллагааг, ялангуяа эдийн засаг, хөдөө аж ахуйн салбарт өргөжүүлэх хүсэлтэй байгаагаа илэрхийлэв. Тэрээр мөн манай улсын хүний нөөцийн салбарт үзүүлж ирсэн Шинэ Зеландын хөгжлийн албан ёсны тусламжийн ач холбогдлыг бид өндрөөр үнэлдэг тухай онцлож, манай төрийн албан хаагчдад зориулсан ELTO хөтөлбөрийг цаашид ч гэсэн үргэлжилнэ гэж итгэж буйгаа тэмдэглэв.
Шинэ Зеландын тал манай хоёр улсын хооронд дипломат харилцаа тогтоосны 45 жилийн ой 2020 онд тохиож буйтай холбогдуулан тэмдэглэн өнгөрүүлэх хүсэлтээ илэрхийлж, ойн хүрээнд хэрэгжүүлэх ажлын төлөвлөгөөний талаар ярилцав. Түүнчлэн талууд бүс нутаг, олон улсын хамтын ажиллагааны талаар санал солилцов.
Киргизийн Элчин сайд К.Бахтыгуловаг хүлээн авч уулзав
Гадаад харилцааны яамны Төрийн нарийн бичгийн дарга Д.Даваасүрэн мөн энэ өдөр Бүгд Найрамдах Киргиз Улсаас Монгол Улсад хавсран суух Элчин сайдаар томилогдсон хатагтай Канайым Бахтыгуловаг хүлээн авч уулзав. Уулзалтаар талууд Монгол, Киргизийн харилцааны өнөөгийн байдал болон цаашид хэрэгжүүлэхээр төлөвлөж буй айлчлал, арга хэмжээний талаар дэлгэрэнгүй санал солилцов.
Төрийн нарийн бичгийн дарга Д.Даваасүрэн Бишкек дэх Монголын ЕКГ-ын статусыг ахиулж, ЭСЯ-аа удахгүй нээх гэж байгаа нь Монгол Улс Киргиз Улстай хөгжүүлж буй харилцаандаа өндөр ач холбогдол өгдөгийн илрэл хэмээн онцлов. Түүнчлэн монголын тал Киргиз Улсыг энэ жил ШХАБ-ыг даргалж буйтай холбогдуулан баяр хүргэж, үйл ажиллагаанд амжилт хүсэв.
Элчин сайд К.Бахтыгулова манай хоёр улс аль аль нь парламентын засаглалтай бөгөөд Монголын ардчилал, нээлттэй нийгэм, сонгуулийн систем, иргэний шинэчилсэн бүртгэл зэрэг хөгжлийн туршлагаас суралцаж ирсэн тухай дурдаад Монгол, Киргизийн хооронд хөгжүүлж буй харилцааг шат ахиулах хүсэлтэй буйгаа тэмдэглэв.
Исламын Бүгд Найрамдах Иран улсын Элчин сайд Мохаммад Кешаварз Задехийг хүлээн авч уулзав
Үүний дараа Төрийн нарийн бичгийн дарга Д.Даваасүрэн Исламын Бүгд Найрамдах Иран Улсаас Монгол Улсад суух Элчин сайд Мохаммад Кешаварз Захехийг Итгэмжлэх жуух бичгээ барихтай нь холбогдуулан хүлээн авч уулзав.
Өнө эртний түүхэн хэлхээ холбоо бүхий Монгол, Ираны найрсаг харилцаа бэхжиж, сүүлийн жилүүдэд худалдааны эргэлт нэмэгдэж байгааг Төрийн нарийн бичгийн дарга Д.Даваасүрэн онцолж, цаашид хоёр талын хамтын ажиллагааг шинжлэх ухаан, боловсрол, хөдөө аж ахуй, байгаль орчин зэрэг салбарт өргөжүүлэх сонирхолтой байгаагаа илэрхийлэв.
Дээд, өндөр түвшний харилцан айлчлал болон хоёр талын яриа хэлэлцээ нь Монгол, Ираны хооронд харилцан ойлголцлыг бэхжүүлэхэд хувь нэмэр оруулж ирснийг Элчин сайд Кешаварз Задех тэмдэглэж, цаашид худалдаа аж үйлдвэрийн танхим хооронд хамтын ажиллагаа тогтоох хүсэлтэй байгаагаа илэрхийлэв.
Польш улсын Элчин сайд К.Бойког хүлээн авч уулзав
Гадаад харилцааны яамны Төрийн нарийн бичгийн дарга Д.Даваасүрэн Бүгд Найрамдах Польш Улсаас Монгол Улсад суух Элчин сайд Кшыштоф Бойко Итгэмжлэх жуух бичгээ барихтай нь холбогдуулан хүлээн авч уулзаж, Монгол Улсад суух Элчин сайдаар томилогдсонд баяр хүргэн хоёр орны харилцаа, хамтын ажиллагааг өргөжүүлэн хөгжүүлэх өндөр хариуцлагатай албанд нь өндөр амжилт хүсэв.
Элчин сайд К.Бойко 2020 онд дипломат харилцаа тогтоосны 70 жилийн ойгоо тэмдэглэх Монгол, Польшийн уламжлалт найрсаг харилцаа, хамтын ажиллагааг бүхий л түвшинд илүү ойр дотно өргөжүүлэн хөгжүүлэхэд өөрийн хувь нэмрээ оруулахын төлөө идэвх санаачлагатай ажиллахаа илэрхийлж, ойрын хугацаанд хэрэгжүүлэхээр төлөвлөсөн айлчлал, арга хэмжээнүүдээ танилцуулав.
