“Армейские игры-2019” олон улсын тэмцээний нэг төрөл болох “Инженерийн томъёолол” тэмцээнд манай улсын цэргийн инженерүүд анх удаа оролцох гэж байгаа билээ. Тэмцээнд ОХУ, Монгол, БНХАУ, Лаос, Пакистан, Беларусь улс гэсэн зургаан орон оролцож байгаа юм. Баг тамирчдыг “Инженерийн томъёолол” тэмцээний шүүгч, Маршал А.И.Прошляковагийн нэрэмжит “Тюмень” хотын цэргийн инженер командын их сургуулийн захирал, хошууч генерал Ф.Д.Евмененко угтан авч амжилт хүссэний дээр тэмцээний ерөнхий дүрмийг танилцуулан, зааварчилгаа өгсөн байна. Энэ сарын 27-ны өдөр багууд сугалаагаа сугалан манай тамирчид 3 номерыг сугалан, эхний гараанд БНХАУ, Лаос улсын багтай өрсөлдөхөөр болсон. Тэмцээн наймдугаар сарын 4-ний өдөр тоотын аварга шалгаруулах тэмцээнээр эхлэх бөгөөд багууд техникүүдээ хүлээн авч, уралдах газар оронтойгоо танилцаад байгаа аж.
“Инженерийн томъёолол” олон улсын тэмцээн нь зургаан нэгж техниктэйгээр өгөгдсөн даалгаварыг буухиа хэлбэрээр гүйцэтгэх юм. Манай улсаас шүүгчээр Батлан хамгаалахын Эрдэм шинжилгээний хүрээлэнгийн захирал, хурандаа Б.Мөнхсайхан томилогдсон бол багийн ахлагчаар Зэвсэгт хүчний Гүүр ус гатлалтын тусгай батальон 234 дүгээр ангийн захирагч, хурандаа Д.Энхцог, багийн ахлах дасгалжуулагчаар Зэвсэгт хүчний 014 дүгээр ангийн захирагчийн орлогч, ерөнхий инженер, дэд хурандаа П.Цэрэндорж нар ажиллаж байна.
