2020 оны 09 дүгээр сарын 16 өдрийн 19.00 цагаас хойш MNBC, Mongolsat, SansarКTV-ийн хэрэглэгчид Монголын зарим телевизийн нэвтрүүлгийг хүлээн авч үзэх боломжгүй болсон тухай гомдлыг манай редакцад хаяглан ирүүллээ.
Хэрэглэгчид эрх ашиг нь зөрчигдөж байгаа учраас асуудлыг шалгуулахаар Шударга өрсөлдөөн, хэрэглэгчийн төлөө газарт гомдол гаргасан тухайгаа мөн мэдэгдэж байна.
Энэ асуудлаар Шударга өрсөлдөөн, хэрэглэгчийн төлөө газрын дарга Б.Бат-Эрдэнэтэй утсаар холбогдож тодруулахад “Өчигдөр энэ асуудалтай холбоотой гомдол бидэнд ирсэн. Үүнийг шалгаж, тодруулах үүргийг холбогдох хүмүүст нь өгч ажиллаж байна. Өргөн нэвтрүүлгийн тухай хууль болон дагалдах журмуудтай холбоотой асуудал үүсээд байна гэж ойлгож байгаа.
Асуудлыг тодруулаад эргэж мэдээлэл өгье.
Харилцаа холбооны зохицуулах хорооноос энэ асуудлыг тодруулах нь зөв байх. Хамгийн гол нь хэрэглэгчийг хохироохгүй байх хэрэгтэй” гэж мэдэгдлээ.
Ямартай ч Өргөн нэвтрүүлгийн тухай хуультай холбоотой асуудал үүсчээ гэж ойлгогдож байна.
Тиймээс Харилцаа холбооны зохицуулах хорооны хэвлэл мэдээлэл хариуцсан мэргэжилтэнтэй холбогдож асуудлыг тодруулахад “Монголын телевизүүдийн холбооноос нэр бүхий телевизүүдийн сигналыг түр хугацаагаар хааж, хязгаарлалт хийсэн байна.
Ямар шалтгааны улмаас ийм хязгаарлалт хийсэн талаар холбогдох байгууллагуудын төлөөллийг дуудаж, тодруулахаар бид ажиллаж байна. Үүний дараа дэлгэрэнгүй мэдээлэл өгье” гэв.
Үүссэн асуудалтай холбогдуулан MNBC компанийн зүгээс өөрийн фейсбүүк цахим хуудсаар дамжуулан мэдэгдэл гаргасан байна. Мөн Монголсат, Сансар кабелийн телевизээс хэрэглэгчдээ хандаж мэдэгдэл гаргаж ажиллаж байгаа юм байна.
Тэдний мэдэгдэлд Монголын телевизүүдийн холбоо урьдчилж мэдэгдэлгүйгээр нэр бүрий телевизийн сигналыг хаасан тухай дурдсан байгаа юм. Яагаад гэнэт ийм асуудал болсон бэ, учир шалтгаан нь юу байв гэдгийг MNBC дуудлагын төвтэй холбогдож тодруулахад “2020 оны 9 дүгээр сарын 16-ны өдрийн 19.00 цаг хүртэл манай үйл ажиллагаа хэвийн явагдаж байсан. Одоо ч хэвийн байгаа.
Гэвч Монголын телевизүүдийн холбоо бидэнд урьдчилж мэдэгдэлгүйгээр 30 телевизийн сигналыг ажлын цаг дууссаны дараа гэнэт хаасан явдал болсон. Сигнал тасрах үед ээлжийн инженерүүд өөрсдийн тоног төхөөрөмжийн хэвийн байдлыг шалгаж, эфир нь хаагдсан телевизүүд рүү холбогдож асуудлыг тодруулахыг хүссэн ч тодорхой тайлбар өгөөгүй. Одоо ч тайлбар өгөхгүй байна. Үүнээс болж манай дуудлагын төвийн ачаалал гурав дахин өсч, бид хүн хүчээ нэмэгдүүлж, иргэдэд болсон учир шалтгааныг тайлбарлаж ажиллаж байна.
Иргэд хэзээ хэвийн болох вэ, хохирлыг хэрхэн барагдуулах вэ, хариуцлагагүй телевизүүд ямар хариуцлагагүй юм бэ гэх зэрэг асуултыг маш ихээр тавьж байгаа ч Монголын телевизүүдийн холбооноос ямарч тайлбар мэдээлэл өгөхгүй байна” гэсэн тайлбарыг өглөө.
Асуудлын учиг Монголын телевизүүдийн холбоо гэх байгууллагатай холбогдоод байна.
Эх сурвалжаас авсан мэдээллээр Монголын телевизүүдийн холбоо үзэгчдээс 5000 мянган төгрөг авах тухай аман гэрээг олон сувгийн дамжуулагчдад тулгаж, шаардлагыг биелүүлтэл эфирээ нээхгүй гэж мэдэгдсэн байна.
МҮОНРТ сар бүр 1600 төгрөг авдагтай адилаар Монголын телевизүүд үзэгчдээсээ төлбөр авах гэж улайрахдаа ийнхүү эфирээ хаах арга замыг сонгон авчээ. Гэвч тэд өөрсдийн орлогыг л бодсноос биш, иргэд, үзэгчдийн тухай огт бодсонгүй.
Төлбөр өснө гэдэг иргэдийн нуруун дээр ирэх ачаа л нэмэгдэнэ гэсэн үг. Мөн цар тахлаас шалтгаалж онлайнаар теле хичээлүүд орж байгаа. Гэвч телевизийн холбооны хариуцлагагүй үйлдлээс болж олон хүүхдийн хичээл завсардлаа. Энэ хариуцлагыг хэн хүлээх вэ?
Энгийнээр хэлэхэд телевизүүд хэрэглэгчээс нэмэлт төлбөр авахын тулд сигналаа хааж хэрэглэгчдийг хохироожээ. Гэтэл яагаад эфирээ хаасан тухай ойлгомжтой ганц ч тайлбар өгч чадахгүй байгаа нь тун харамсалтай.
