Монгол Улсын 2021 оны төсвийн тухай болон түүнийг дагалдан батлагдсан хуулиудад бүхэлд нь тавьсан Монгол Улсын Ерөнхийлөгчийн хоригийг УИХ-ын чуулганаар хэлэлцэж байна.
Хоригт төсвийн нийт зардлыг 20 хувиар хэмнэж, хүндрэл бэрхшээлийг даван туулахад зориулсан эрсдэлийн сан байгуулах ёстой гэсэн юм. Ингэхдээ шаардлагагүй хөрөнгө оруулалтуудыг зогсоох нь зүйтэй гэсэн юм.
Соёлын салбарын хөрөнгө оруулалтыг царцаана гэж байгаа нь тусгаар тогтнолоо үгүйсгэж байна гэж ойлгож байна
Тэгвэл шаардлагагүй хөрөнгө оруулалтыг зогсоохдоо соёлын салбарт хийсэн хөрөнгө оруулалтыг зогсоох хэрэгтэй гэснийг УИХ-ын гишүүн Б.Баярсайхан, Г.Мөнхцэцэг нар эсэргүүцэж үг хэллээ.
УИХ-ын гишүүн Г.Мөнхцэцэг “Нөхцөл байдал хүнд байгааг ойлгож байгаа ч ирээдүйд чиглэсэн төсвийг батлах ёстой гэж боддог. Өчигдрийн бороо өнөөдөр орохгүй гэж үг бий. Цэцэрлэг, сургууль зэрэг боловсрол, соёлын салбарын бүтээн байгуулалтыг төсөвт царцаахыг ойлгохгүй байна. Соёлын салбарын хөрөнгө оруулалтыг царцаана гэж байгаа нь тусгаар тогтнолоо үгүйсгэж байна гэж ойлгож байна” гэсэн юм.
Харин УИХ-ын гишүүн Б.Баярсайхан “Төсвийн байнгын хорооны санал дүгнэлтэд иргэдийг орлоготой болгож, цар тахлын үед ААН-үүдийг дэмжихийн тулд соёлын төв, музейн барилгуудын хөрөнгө оруулалтыг түр хугацаанд зогсоох санал орж ирсэн байна. Би үүнийг эрс эсэргүүцэж байна. Хүнд цаг үе ирснийг ойлгож байна. Гэхдээ соёл, түүх, өв уламжлал гэдэг бол тухайн улс орны тусгаар тогтнол, дархлаа нь байдаг. Бидний өнгөрсөн 30 жилд гаргасан хамгийн том алдаа соёлын салбарыг шоовдорлож, энэ салбарт байсан бүтээн байгуулалтыг устгасан явдал. Хүүхэд залуучуудын театр өнөөдөр банк болсон. Ард кино театрын барилга худалдааны мухлаг болсон. Цирк байхгүй болсон. Бидний өвөө, эмээ ээж аав бүхнийг фронтод гэсэн уриатай ажиллаж байх үедээ МУИС-ыг байгуулсан юм шүү.
Улстөржилт гэдэг зүйлээ соёл, спортын салбараас хол байлгаач, 2021 оны төсөвт суусан жаахан мөнгийг битгий хөндөөч гэж хэлмээр байна
Ю.Цэдэнбал гуайгаас хойш 50-60 жилийн дараа соёлын салбарт хөрөнгө оруулалт тавиад, энэ салбарыг өөд нь татъя гэтэл улстөржүүлэх асуудал гаргаж ирж байгаад харамсаж байна.
Өөрсдөө соёлын салбараа орхисон хэр нь өнөөгийн залуусыг Монгол хүн байсангүй гэж шүүмжилдэг. Уран бүтээлчдийн урлагт хайртай зүрх сэтгэл дээр л Монголын соёлын салбар явж байгаа шүү. Хүнд цаг үе ирснийг ойлгож байна. УИХ-ын гишүүд нь соёлын салбарын ад үзээд суувал ард иргэдээ яаж соён гэгээрүүлэх вэ. Музейн барилгыг яагаад ингэж үл тоож байгаа юм бэ. Улстөржилтөө соёл, спортын салбараас хол байлгаач, 2021 оны төсөвт суусан жаахан мөнгийг битгий хөндөөч” гэсэн юм.
Өнөөдөр цар тахлыг дотооддоо алдчихсан нөхцөлд улс төржилт байх ёсгүй. Энэ бол хориг биш сануулга
Үүний хариуд Ерөнхийлөгчийн зөвлөх Л.Болд “Хориг ярьж байгаа хандлага буруу тийшээ явчихлаа, харамсалтай байна. Бид хоригийг улс төржүүлж байна гэж бодохгүй байна. Өнөөдөр цар тахлыг дотооддоо алдчихсан нөхцөлд улс төржилт байх ёсгүй. Энэ бол хориг биш сануулга. Өнөөдөр Монгол Улсад улс төр гэж байхгүй. Бид 24 цагаар ажиллах ёстой шүү дээ. Нэг автобусны жолооч халдвар авахад юу болж байгааг харж байна. Өнөөдөр танайх манайх, улс төрийн өөр байр суурь гэж байхгүй. Та бүхэн ярьж байгаад шийд. Өдөр шөнөгүй сууж байгаад төсвийн тодотголыг батлаа биздээ. Айл өрхүүдээ, ААН-ээ дэмжих бололцоо гэж хараад шийдээсэй. Гол нь өнөөдөр бид илүү дутуу зардлын асуудлаа эргэж хараач гэж байгаа юм. Соёл урлагийн салбарын хөрөнгө оруулалтыг зогсооё гээгүй. Тавиагүй асуудлыг байгаа юм шиг ярьж байгааг болих хэрэгтэй” гэсэн юм.
