ОХУ-ын сөрөг хүчний удирдагч Алексей Навальныйн дэмжигчдийн зохион байгуулсан жагсаалыг хүчээр дарах гэж оролдсон Оросын хүчний байгууллагуудыг Европын холбоо болон АНУ эрс буруушааж, тус улсын эсрэг хориг арга хэмжээ авах санал гаргалаа.
Германы парламентын гишүүн Вебер жагсаалд оролцсон мянга мянган хүнийг баривчилсан явдлыг шүүмжилж “Европын холбооны Гадаад хэргийн сайд нар энэ асуудлыг дахин тойрч гарахгүй. Путины хамгийн эмзэг цэгт нь хатгах ёстой. Тэр нь мөнгө” хэмээн Ройтерс агентлагт ярьсан байна.
Веберийн хэлснээр Европын холбоо Ерөнхийлөгч Путины тойрон хүрээлэгчид рүү санхүүгийн гүйлгээ хийхээ зогсоох ёстой. Мөн Европын холбоо европ руу байгалийн хий дамжуулах “Nord Stream 2” хийн шугамын барилгын ажлыг зогсоох боломжтой гэв. Өнгөрсөн пүрэв гарагт Алексей Навальныйг баривчилсантай холбоотойгоор Евро парламент “Nord Stream 2” шугамын барилгын ажлыг зогсоохыг уриалсан.
Европын холбооны Гадаад бодлогын газрын тэргүүн Жозеп Боррель Орос дахь нөхцөл байдал болон Европын холбооны хариу арга хэмжээг гадаад хэргийн сайд нарын түвшинд хэлэлцэнэ. “Иргэдийг олноор нь баривчилж, тэдний эсрэг хүч хэрэглэж, интернэт, холбоо харилцааг тасалсан явдлыг би буруушааж байна” хэмээн Боррель Твиттертээ бичжээ.
Оросын эсрэг шинэ хориг тавихыг мөн Францын Гадаад хэргийн сайд Жан-Ив Ле Дриан уриалав. Ле Дриан жагсагчдыг бөөнөөр нь баривчилсан нь ардчиллын эсрэг “хүлээн зөвшөөрч боломгүй үйлдэл” гээд энэ улс “дарангуйлал руу халтирч байна” гэж тэмдэглэжээ.
Польшийн Ерөнхийлөгч Анжэй Дуда хориг тавих нь хүчирхийлэл хэрэглэлгүйгээр “Оросыг олон улсын хууль тогтоомж дагаж мөрдүүлэх цорын ганц арга зам” гэсэн байна.
Их Британийн Гадаад хэргийн сайд Доминик Рааб “энгийн номхон жагсагчид болон сэтгүүлчдийн эсрэг үйлдсэн хүчирхийллийг” буруушааж, Оросын засгийн газрыг хүний эрхийг дээдлэх тухай олон улсын хууль дүрмийг сахихыг уриалав.
Ням гарагт АНУ-ын Төрийн департаментийн албан ёсны төлөөлөгч Нед Прайс жагсагчид болон сэтгүүлчдийн эсрэг авч хэрэгжүүлсэн “бүдүүлэг арга барилыг” мөн буруутгажээ. “Оросуудын тайван жагсаал цуглаан хийх, үзэл бодлоо чөлөөтэй илэрхийлэх эрхэнд халдаж байгаа үйл ажиллагаа, сөрөг хүчний удирдагч Алексей Навальныйг баривчилсан нь, түүнээс үүдсэн эсэргүүцлийн жагсаалыг таслан зогсоож буй нь иргэний нийгэм, үндсэн эрх чөлөөг хязгаарлах аюулын дохио болж байна” хэмээн Прайс хэлсэн байна.
