Нийслэлийн АН-ын даргаар сонгогдсон Э.Бат-Үүлтэй ярилцлаа.
-Ардчилсан нам бол харьцангуй залуу нам. Залуучууд ч улстөрд манлайлал үзүүлэх нь нэмэгдэж байна. Харин та АН-аас холдож чадахгүй байгаа шалтгаан нь юу вэ?
-Би нэр дэвших үедээ хэлж байсан. Нийслэлийн АН-ын даргад нэр дэвшиж буй шалтгаан бол намын дотор үүсээд байгаа шалтгааныг гэтлэн давахад хувь нэмэр оруулъя гэдэгтэй холбоотой. Үүсээд байгаа нөхцөл байдлыг хөндлөнгөөс хараад сууж чадахгүй байна. Намыг дотор нь эвлэрүүлэхэд нийслэлийн нам чухал үүрэгтэй. Нийслэлийн нам бол энэ намын цөм юм. Хоёрдугаарт, ардчилал алдагдаж мэдэхээр байна. Хоёр хөрш ардчилалд хатуу дайн зарлалаа. Өнөөдөр хоёр хөрш сөрөг хүчнийг хомроголон баривчилж, цөлж байна. Хоёр хөршид өрнөж буй ардчиллын эсрэг дайн Монгол Улсад импортлогдож орж ирэх хандлага ажиглагдаж байна. Эрх баригчид дарангуйлал руу шилжих бэлтгэл ажлаа хийж байна уу гэх хардлага төрж байна. Гуравдугаарт, 2016 оноос хойш МАН юм хийсэнгүй. 2012-2016 онд хотын дарга байхад хийсэн бүх ажлыг хорлон сүйтгэсэн. Нийслэлд сүүлийн 5 жилийн хугацаанд бүтээн байгуулалт зогссон. Гэр хорооллын дахин төлөвлөлт, метро барих ажил бүрэн зогссон. Ийм асуудлууд нэр дэвших шалтгаан болсон.
-Нийслэлийн АН-ын даргын хувьд таны төлөвлөж буй хамгийн эхний ажил юу вэ?
-Намын доторх зөрчлийг гэтлэн давахад чиглэж байна. Өнөөдөр Монголын ардчилалд бодит аюул тулгарлаа. Өнгөрсөн 30 жилд ийм аюул тулгарч байгаагүй. Манай гадаад нөхцөл маш хүнд байдалд орчихлоо. Бид дарангуйлал руу явж байгаа хоёр хөршийн дунд хавчуулагдчихлаа. Хамгийн гол нь энэ хоёр маань Монголын ардчилалд таагүй ханддаг. Ийм үед ардчиллын гол тулгуур болсон АН-ын хагарал Монголын ардчилалд хохирол учруулах гээд байна. Тиймээс намд үүсээд байгаа хагарлыг таслан зогсоох хэрэгтэй.
