Улс төрийн намын тухай Википедиа толь бичигт: Улс төрийн нам гэдэг нь үзэл бодлоороо эвлэлдэн нэгдсэн бөгөөд засгийн эрхийг авах эцсийн зорилготой хэсэг бүлэг хүмүүсийн нэгдэл, улс төрийн байгууллага юм. Улс төрийн намын үндсэн үүргүүд:
- Нийгмийн үүрэг – иргэдийн ашиг сонирхлыг нэгтгэн тодорхойлохыг эрмэлздэг бөгөөд тэдний хүсэл зоригоо илэрхийлэх арга замыг “зааж” өгөн тэдний шаардлагыг тодорхой зохих түвшинд гаргадаг (хурал, жагсаал, цуглаан зохион байгуулахаас эхлээд хувьсгалд уриалан дууддаг).
- Үзэл суртлын үүрэг – нийт нийгмийн гишүүд болон өөрийн гишүүддээ улс төрийн тодорхой үзэл баримтлалыг (либерал, консерватив, социал-демократ, фашист, коммунистгэх мэт) санал болгож итгэл үнэмшил болгосноор өөрсдийн боловсруулсан нийгмийн өөрчлөлтийн стратегиа дэмжүүлэх.
- Улс төрийн үүрэг (Сонгуулийн үүрэг, Удирдлагын үүрэг) – төрийн сонгуульд оролцож засаглах эрх мэдэл болон түүнд оролцох эрх авах, төрийн бодлогыг тодорхойлох, төрийн албан тушаалд өөрсдийн хүмүүсийг бэлтгэн байршуулах.
- Ард түмний эрх ашигт нийцүүлэн ажиллах
Улс төрийн намын тухай Монгол улсын хуулийн
4 дүгээр зүйл.Намын тухай ойлголт
4.1.Нам нь Монгол Улсын Yндсэн хуульд заасны дагуу нийгмийн ашиг сонирхол болон хувийн үзэл бодол, улс төрийн үйл ажиллагаа явуулах зорилгын үүднээс сайн дураараа эвлэлдсэн Монгол Улсын иргэдийн нэгдэл мөн.
4.2.Монгол Улсын бүрэн эрхт байдал, тусгаар тогтнолыг бусниулах, үндэсний эв нэгдлийг задлан бутаргах, Yндсэн хуулийн бус аргаар төрийн эрхийг авах, хүч түрэмгийлэх, олон түмнийг үймүүлэх, айлган сүрдүүлэх, аллага, хядлага үйлдэх, яс үндэс, арьсны өнгөөр ялгаварлан гадуурхах, бусад орны тусгаар тогтнол, нутаг дэвсгэрийн бүрэн бүтэн байдлын эсрэг үйл ажиллагаа, сурталчилгаа явуулах зорилгоор, түүнчлэн шашны, цэргийн болон цэрэгжсэн, фашист нам байгуулахыг хориглоно.
5 дугаар зүйл.Намын үйл ажиллагааны зарчим
5.1.Нам үйл ажиллагаандаа дараахь нийтлэг зарчмыг баримтална:
5.1.1.ардчилсан ёс, шударга ёс, эрх чөлөө, тэгш байдал, үндэсний эв нэгдэл, тусгаар тогтнолыг хангах, нийгэм, төрийн аюулгүй байдлыг сахиж, хуулийг дээдлэн биелүүлэх;
5.1.2.үйл ажиллагаагаа ил тод явуулах;
5.1.3.гишүүддээ намын удирдах байгууллагын төлөөлөлд орох, сонгуульд нэр дэвших, сонгогдоход үндэс, угсаа, арьсны өнгө, нас, хүйс, хөрөнгө чинээ, эрхэлсэн ажил, албан тушаалаар ялгаварлахгүйгээр адил тэгш боломж олгох;
5.1.4.дотоод асуудлаа ардчилсан зарчмыг баримтлан олонхийн саналаар шийдвэрлэх;
5.1.5.бусад намын үйл ажиллагаанд хүндэтгэлтэй хандах, дотоод хэрэгт нь хөндлөнгөөс үл оролцох, өөрийн үзэл баримтлалыг тулган шаардахгүй байх;
5.1.6.үйл ажиллагаагаа нутаг дэвсгэрийн зарчмаар явуулах;
5.1.7.Монгол Улсаас гадаад улстай тогтоосон найрамдалт харилцаа, хамтын ажиллагааг эрхэмлэн хүндэтгэх. Гэж заасан байдаг ажгуу.
Мөн намын тухай тодорхойлолтыг В.И.Ленин гэж хүн “Нам манай эрин үеийн оюун ухаан, нэр төр, нандин чанар мөн” гэж өгчээ. Зүй нь намд тухай нийгмийнхээ хамгийн оюунлаг ухаалаг хүмүүс нэгдэн тэдний бүтээсэн үйл нь нэр төрийн хэрэг болж ард түмэн нь нандигнан хайрлах ажээ.
Харамсалтай нь монгол улсад эдгээр тодорхойлолтуудад тэнцэх улс төрийн нам байна уу. Монгол улсын засгийн эрхийг сүүлийн 30 жилд барьсан эрх баригч намууд мөн энэ шалгуурт нийцэх үү.
Хэлбэр талаасаа намууд улс төрийн мөрийн хөтөлбөрөө түмэнд танилцуулан дэмжүүлж/сонгуулиар/, засгийн эрхийг авч эрх мэдэлтэн болцгоож, ардчилал, шударга ёсны тухай ярьж жагсаал цуглаан хийгээд, нэг их тэмцээд, бүтээн байгуулаад байгаа билээ.
Мөн чанартаа сүүлийн 30 жил монгол улсаас хулгайлаад, харийнханд худалдагдаад, эх орноосоо урваад, улс орноо сүйдэлчихээд байгааг намын сонгуулиар эрх мэдэлд хүрч хулгай хийсэн дарга, эрх мэдэлтнүүдийн шүүхээр шийдэгдсэн, түмэнд ил болсон олон гэмт хэргүүд нотолно. Тэд одоо баяжсан, эрх мэдэлтэй, ямар ч хэргээс мултрах, аргалах чадалтай болсон ба зарим нь гадаад руу зугтсан байгаа. Хожим эх оронгүй хүнийг хэн тоох юм бэ. Палестин, индианчууд, курдүүд шиг алуулаад, хөөгдөөд явах биз ээ. Хажууханд өвөр монгол ахдүү нарыг хэл соёлоос нь хүчээр салгаад түүх, хөшөө дурсгалыг нь сөнөөгөөд байгаа жишээг мэдэж цөхөх юмгүй дээ.
Чинийх долоо, минийх долоохон гэдгийн үлгэрээр эрх баригч намууд аль аль талдаа үг хэлэх хариуцлага тооцож чадахааргүй болтлоо шаантагт орчихсон, үндсэндээ бол луйварчдын бүлэглэл засгийн эрх барьж байна гэж хаа сайгүй бичиж ярьж байна.
Дүр эсгэсэн ардчиллын зүс дагасан нохой болсон төрийн албаны зөвлөл маш олон гэмт хэрэгтнүүдийг чухам төр түмэн олны итгэл даах төрийн жинхэнэ албан хаагч гээд батлаад байсан чинь эрх мэдэлд очоод тендер, албан тушаал, авлигын хэрэгт орооцолдоод шоронд хүртэл суучихаад буцаад төрийн ордон дотор сэнтийд залраад сууж байдгийг түмэн мэднэ. Гаалийн дарга байсан нэг нөхрийг 100 саяын авлига авлаа, чухам барьчихлаа гээд байхад намын дарга нь намдаа хандив өргөсөн гээд тодорхойлолт гаргаж өгсөн талаар их шуугисан даа. ТАЗ-ын дарга нь байсан нэг нөхөр гадаадад элчингээр амралтанд явж ирчихээд одоо төрийг ариун байлгахад ТАЗ чухал үүрэгтэй гм юм яриад тэмцэгч болох шахаад байгаа. Улсаас хулгайлж намдаа өргөвөл гэм биш гэсэнтэй адил. Оюу толгойн гэрээ монгол улсын эрх ашигт хохиролтой болжээ, гэрээ байгуулсан хүмүүс асуудалтай гээд байгаа нь монголын төрд олон улсын хэмжээний гэрээ хэлцэл байгуулах чадвартай албан хаагчид мэргэжилтэн байхгүй байна аа л гэж хэлээд байгаа юм угтаа бол.
Дээр өгүүлсэн намын тухай ардчилсан ёс, шударга ёс, эрх чөлөө, тэгш байдал, үндэсний эв нэгдэл, тусгаар тогтнолыг хангах, нийгэм, төрийн аюулгүй байдлыг сахиж, хуулийг дээдлэн биелүүлэх зарчмууд, нийгмийн үүргээс нэг нь ч биелэхгүй байна.
Ерөнхийлөгчийн нэг намыг татан буулгах тухай санал нэг талдаа зөв ч, зүй нь хоёуланг нь татан буулгах хариуцлага татах асуудал яригдах ёстойсон.
Намын гишүүн, дэмжигч, цүнх баригчид гээд байгаа бүхэн цаад утгаараа эрх орноо сүйтгэдэг луйварчдын бүлгийн хамсаатан гэж ойлгогдоно.
Хятадууд 2045 он гэхэд монголыг авна гэсэн гэж яриад, социал сүлжээгээр зөндөө бичлэг гараад байгаа. Хожмын өдөр хэрэв Монгол улс тусгаар улс байвал энэ намд зүтгэж байсан гэх нөхдүүд, түүний үр ач нар хараагдах нь зайлшгүй.
Ерөнхийлөгчийн энэ удаагийн сонгуулиар гэхэд намуудын төлөөлөл эрх мэдэлд хүрэхийн тулд сурталчилгаагаа бүүр аймаг хошуу хэсээд түмнээр нь цуглуулаад хуйлруулаад жинхэнэ ковид тараагаад явна
Чухам л хорио цээр тогтоогоод жижиг сажиг гэлтгүй хориг зөрчсөн гэсэн бүхнийг торгоод яллаад сүр болоод байсансан. Одоо өвчлөл даамжирвал гарах зардлыг эдгээр намууд, дэмжигчид нь, нэр дэвшигчид өөрсдийн хармаанаас төлөх үү ард түмний төсвөөс гаргах уу.
Үндэсний эрх ашиг, тусгаар тогтнол, ард түмний итгэл үнэмшил хаа явна аа.
Нийтлэл бичсэн TSMJL 2021-06-05
